Esabbuli 65 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufumia neende ohweebasa

¹ Ewe ohoyera efuma, Ewe Nasaae, oli mu Siyooni; haandi ewe niiwe yi hunasuubisaanga ebichubo byeefwe,

² Ewe niiwe owuliraanga esaala cheefwe! Ewe niiwe yi buli muundu achia ohwiichaangaho

³ hulw'ebibi byaabwe. Obuhyaamu bweefwe nibutwiichuuleho, ewe niiwe onyala ohutuleheramo.

⁴ Mani oyo ali neende ehabi yi wadoola mani waamusudya aambi naawe, ohumenyaanga mu nyuumba yao! Huchia ohwiikuswa neende obulai bw'enyuumba yao, enyuumba yao njoolerefu!

⁵ Otukobolaangamo neende ebiholwa byao biwukisa, n'otununula, Ewe Nasaae w'obuwonia bweefwe, ewe oli esuubi ly'esyaalo syoosi, haandi w'enyaanja hoongo ch'eyale muno;

⁶ omweene bunyala obwanyala ohutaao engulu, ewe owekedeeresania obunyala;

⁷ ewe oyenjesaanga ohuwoola hw'enyaanja, ohuwoola hw'amafwiinda kaachio, neende oluhero lw'abaandu;

⁸ hu bulaanu abo abamenya mu bituundu by'eyale muno hu syaalo huno banyale ohutya obulolero bwao; ewe okeraanga obwiire nibuhya haandi nibwiira nibyehuuma neende esangaalo.

⁹ Ewe okeniyaanga esyaalo mani osichuhiirira amaachi, ewe osiichusamo ebiindu bilai; omwaalo kwa Nasaae kweechulamo amaachi; ewe obakabulaanga emwo yaabwe, n'omalire ohuyitekeha bulai bweene.

¹⁰ Ewe ochuhiiriraanga endalo chaasyo obutayeera, n'ochwichwiisa emibuumbi kyasyo, osidosaadosa neende efula, haandi n'osiberesa ehabi yohuhula-hulana.

¹¹ Ewe omalirisaanga omwaaka neende ekesa liingi, emihoosi ky'ebigaari byao kidoonya obunulu.

¹² Ebyaayiro byomu siino biteenga-buteenga, ebigulu biichuuleho esangaalo,

¹³ emiboka kinyoleebwe neende ebyaayo, amahooho nako kechuulemo emere, bino byoosi byaayuha nibyeembera alala neende esangaalo.