Esabbuli 64 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba obuliindi

¹ Wulira ekono lyaange, Ewe Nasaae, koti lu ndekanyiirisa; liinda obulamu bwaange obutuse eyiri obululu bw'omusuku waange,

² ngise wuunduse eyiri abahola-mbi abali ohundyamo olukwe, haandi ohutula eyiri endekeha ch'abahola-mbi,

³ abalebalebana enimi chaabwe koti engaanga, abapiima emboosi chaabwe ndulu koti obusaale,

⁴ nibalasa nibeekisiire oyo otaaliho esyonoono, nibamulasa bwaangu, haandi nibatatya daawe.

⁵ Baandira hu bichiiririrwa byaabwe bibi; bakaniaaya hu huteka emiteego mu bweekisi, nibabaasa bati, “Wiina mweene onyala ohutubona?

⁶ Wiina mweene onyala ohubona yaafuumbula obutemo bweefwe? Efwe humalire ohubaasa bulai hwahola olukwe lutanyalihana.” Olwohuba ebibaaso byomuukati bweene by'omuundu, haandi neende omwooyo kwae byeekisa eyale muno!

⁷ Nae Nasaae achia ohulasa obusaale bwae bubooleho; bachia ohwichuhana nibanyaaliihe.

⁸ Ohweema hu lulimi lwaabwe, achia ohuboosa hu husihirira; mani abo boosi abanabewuunjaho, bachia ohuyuyaanga emitwe.

⁹ Hu baandu boosi baachia ohutya; bachia ohukaniaayaanga hu biindu bi Nasaae yahola haandi nibabaasa hu biholwa byae.

¹⁰ Lehe abaluungifu beehoyere mu Omwaami, mani beeruhireenge mu Omwaami Lehe abo boosi abaluungifu mu mwooyo bamufumie.