Esabbuli 60 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ewe Nasaae, ewe otujwaang'ire, waahalaka engaka cheefwe; wanyoolera; nae tukobose buyaaha.

² Ewe wakera esyaalo syateengereha, ewe wamala ohusyaataniamo; buka enjafwa chaasyo, olwohuba siri ohusaasakuha.

³ Ewe wakera abaandu bao basaanda muno; hwadokaana koti abaandu bameerere amalwa.

⁴ Ewe, wasiingisira ebbeendera abo abahutya, oti beeruhireenge yooli nibeewonia ohusihiriswa.

⁵ Mbwe abaandu boheera banyale ohununulwa, babeerese obuyiingiri neende omuhono kwao muluungi mani otukobolemo!

⁶ Nasaae alomalomeere mu nyuumba yae ati: “Neende obuyiingiri buhoongo, njia ohukabulamo Sekemu haandi male ngabaniemo Ehooho lya Sukooti.

⁷ Gileadi syaange nisyo; Manaase syaange; Efuraimu nisyo ekofia yaange y'esichuma; Yuda nisyo endawusi yaange y'obutuki.

⁸ Moabbu nisyo yi ndeyosera amakulu kaange; humukulu wa Edomu nihwo hungeeng'a ebiraato byaange; hu Filisitia nihwo hu ndehuumira ninyingiire.”

⁹ Naanu mweene ochia ohundeeta hu siko sy'olukoba? Wiina mweene ochia ohunyemerera njole mu Edomu?

¹⁰ Ewe haba siwatujwaang'a, ewe Nasaae? Ewe Nasaae, haba s'okeenderaanga alala neende amaye keefwe.

¹¹ Ewe, tuhoonye abasuku beefwe, olwohuba obuhoonyi bw'omuundu bubulamo esilai syoosi!

¹² Nihuli alala neende Nasaae, efwe huba huchia ohuyiingira; oyo niye ochia ohuseenakira aasi abasuku beefwe.