Esabbuli 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba obuhoonyi mu biha by'ebidinyu

¹ Ewe Omwaami, mu tima lyao otaanjoloobya daawe, oba wasaandya mu bwaalaba bwao

² Ewe Omwaami, ngwiire esisa, olwohuba ndi mubuchuuni; ewe Omwaami, monie, olwohuba amakuumba kaange kahinaakiriha.

³ Obulamu bwaange bwelalihirifu muno. Nae ewe Omwaami, wahaliinde ohwoola liina n'otaahoonya?

⁴ Ewe Omwaami, kaluuhana mani owonie obulamu bwaange; monie ohweema hu buheeri bwao butaakama.

⁵ Olwohuba emakoombe yibulayo ohwiichulisa; emakoombe yibulayo ohufumia.

⁶ Ese njoong'ere neende ohweelira; buli siro ndosa obuliri bwaange neende amasika; ndosa esyeyikiho syaange neende amasika.

⁷ Emoni chaange chooboohe hulw'esibeera; chiwofula hulw'ebidinyu byaange.

⁸ Mumbweere-eyi, eng'we abahola-mbi mweesi; olwohuba Omwaami amalire ohuwulira ekono ly'ohulira hwaange.

⁹ Omwaami amalire ohuwulira amaliro kaange, Omwaami afukiriire ohusaba hwaange.

¹⁰ Abasuku baange boosi bachia ohudiirwa esoni haandi basaande muno; bachia ohusuda enyuma mani badiirwe esoni mu siha syeene esyo.