Esabbuli 57 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO1 Ngwiire esisa, Ewe Nasaae waange, ngwiire esisa, olwohuba mu ewe mwoong'ene nimwo mu bulamu bwaange bunyoola obweyikamo; mu siiniha sy'embaya chao, nimwo mu njia ohweyikamaanga, ohwoola ebifuusye bisihirisa bichia ohubita biweeo. 2 Ese ndiriraanga Nasaae ow'Aakulu Muno, eyiri Nasaae owosereseraanga ebichiiririrwa byae mu bulamu bwaange. 3 Oyo niye ochia ohulagira naali Muukulu, mani yaamonia, achia ohudiisa esoni abo abali ohuusenakiraanga. Nasaae waange achia ohuleeta obuheeri bwae butaakama, neende obweesikwa bwae! 4 Nambaala mu basuku baange abali koti edalang'i chilichaanga abaandu; ameeno kachio kali koti amahaango neende obusaale, nae enimi chachio chiri koti engaanga njoki. 5 Yekesa obuhunuufu bwao buli muukulu, Ewe Nasaae! Leha oluyaali lwao lwiichule mu syaalo syoosi! 6 Baateka oluhaanda ohudiira amakulu kaange; obulamu bwaange bweechulamo engisa. Bayaba obuko hu ngira yaange, nae haandi abeene nibo ababukwiiremo. 7 Omwooyo kwaange mwoomiifu nikwo, Ewe Nasaae, omwooyo kwaange mwoomiifu! Mani njia ohweemba bulai nihufumia! 8 Omweene njia ohusingiira! Omweene njia ohuubba eduungu neende obuhana! Ese njia ohusimusa amabwiibwi! 9 Njia ohuhweebasa muno, ewe Omwaami, mu lwichuule lw'abaandu; Njia ohuhweembera nihufumia mu byaalo. 10 Olwohuba obuheeri bwao butaakama, huhunuufu muno, hwoola Muukulu, obweesikwa bwao bwoosi bwoola mu maleesi. 11 Yekesa obuhunuufu bwao buli muukulu, Ewe Nasaae! Leha oluyaali lwao lwiichule mu syaalo syoosi! |