Esabbuli 53 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obubi bw'omuundu

¹ Abasiru baboolaanga mu myooyo kyaabwe bati, “Nasaae abulao.” Abo baba bamala hale ohudoondobana, nibaholaanga ebiindu bibi by'omufuto; abulao kata omuundu mulala ohola esiindu silai, abulao kata mulala.

² Nasaae yewuunjira Muukulu ohubona abaana b'abaandu ohubonaho nibahabaamo abanyala ohuba nibali neende amakesi, abanyala ohuba nibamukoonyaanga.

³ Nae boosi bamala hale ohumweekabulaho; boosi bafwaanana sa obuhyaamu; abulamo oyo onyala ohuholaho esiindu silai daawe, bbe, abulamo kata mulala ati.

⁴ Obaasa oti abo boosi abahola-mbi haba sibali neende amakesi, abo abasihirisa abaandu baange koti lu bahalya obusuma babumalao, haandi abahaya ohwiinamira Nasaae?

⁵ Mbabo, bali ao, mu hutya huungi muno, mu hutya hutabechaangao hooho! Olwohuba Nasaae achia ohusakuula amakuumba k'abaandu batamutya; bachia ohudiirwa esoni muno, olwohuba Nasaae yamala ohubajwaang'a hale muno.

⁶ Eee, ohununulwa hwa Yisiraeli huhoya hwahutula Siyooni! Nasaae n'alyoola ohukobosera abaandu bae ehabi, Yakobbo achia ohweehoya, mani Yisiraeli yesi yasangaala.