Esabbuli 50 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiinamira Nasaae hwadyeeri

¹ Nasaae w'obunyala bwoosi, Omwaami, alomaloma n'alaanga esyaalo ohutulira ebukwe ohwoolera elalira emuumbo.

² Nasaae yaaduha n'atulira mu Siyooni, esiko syoolerera mu siroonyo.

³ Nasaae weefwe ali ohwiichia, haba saali mu masididye, omuliro kweeleba kuli mu moni wae, esiifuusye sy'amaani simwebodoohaanie.

⁴ Alaanga ekulu neende esyaalo ohuba abaloli ohumubona koti lu aheengera abaandu bae omusaango.

⁵ Aboola ati, “Mumbuusire yi ndi abeesikwa baange, abahola endagaano naange nibayaana ebiyaanwa”

⁶ Ekulu lyoosi lilaangirira obuluungifu bwae, olwohuba Nasaae mweene niye omuheengi w'emisaango!

⁷ “Tekeerese, eng'we abaandu baange, mani nomanome. Ewe Yisiraeli, ese njia ohuhulomalomaho. Ese niise Nasaae, Nasaae wao.

⁸ Haba siindi ohuhuseya hulw'ebiyaanwa byao daawe; ebiyaanwa byao bisaambe bi ndi mu moni waange ebiha byoosi.

⁹ Haba siinjia hufukiirira esurusi yoosi ohutula mu daala lyao daawe, kata ehole yoosi ohutula mu byaayo byao.

¹⁰ Olwohuba ebisolo byoosi ebyomu siparara byaange nibyo, kata neende eng'oombe chiri hu ngulu elifu neende elifu.

¹¹ Ese manyire amayoni koosi akabburuha, haandi esyo syoosi esikeenda mu siino syaange.”

¹² “Nikali mbwe enjala yiinuma, haba si ndahahuboleere daawe; olwohuba esyaalo syoosi, neende ebiindu byoosi ebisirimo byaange nibyo.

¹³ Ese mani ndichaanga enyama y'esurusi, oba ng'wechaanga amabaanga k'embusi?

¹⁴ Eng'we, yaneenge eyiri Nasaae esiyaanwa sy'ohweebasa, haandi mutuungeenge obweyamo bweeng'we eyiri oyo ow'Aakulu Muno;

¹⁵ mani haandi muundirireenge mu ndaalo ch'ebidinyu; ese njia ohubanunula, mani mufumyeenge.”

¹⁶ Nae eyiri oyo omubi, Nasaae aboola ati: “Bunyala siina bu ewe oli nabwo ohwehoonyeraanga ebilagiro byaange, oba ohulomalomaanga endagaano yaange hu minwa kyao sa?”

¹⁷ Olwohuba ewe wasyuula hale ohweetuka, mani osukunaanga emboosi chaange emukoongo wao.

¹⁸ N'obonaho omwiibi, oyo niye y'owaamba obwiicha; haandi okeenderaanga mu mukaanda kw'abacheke.

¹⁹ Ewe walehuula omunwa kwao ohulomalomaanga ebibi byoong'ene, haandi neende olulimi lwao lwosi ohutekehaanga obubacha bwoong'ene.

²⁰ Wihaliraanga ohumoonyaanga mwaanamao; ochalaasaanga mwaanamao mweene.

²¹ Ebiindu bino byoosi wabihola, naange nindawuleera sa; wabasaanga oti ese syeesi ndi koti ewe. Nae esiha sino mbano ndi ohuhuseya, mani male nde omusaango mu moni wao.

²² “Diira sino womiise bulaanu, ewe owebirira Nasaae, ataali ao njia ohuhutaandula mani abuleo omuundu onyala ohununula!

²³ Oyo oleeta esiyaanwa sy'ohweebasa aba yanjiisamo oluyaali; eyiri oyo olagira engira chae ohuba endai niye yi njia ohweekesa obuwonia bwa Nasaae!”