Esabbuli 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba obuliindi

¹ Ewe Omwaami, tekeeresa emboosi chaange; wulira amaliro kaange.

² Tekeeresa ekono ly'ohulira hwaange, ewe Omutuki waange haandi Nasaae waange. Olwohuba niiwe Omwaami yi saba.

³ Ewe Omwaami, echuli-chuli owuliraanga ekono lyaange; echuli-chuli hutekeheraanga esiyaanwa, mani niinda wungobolamo.

⁴ Olwohuba ewe haba sooli Nasaae osangaaliraanga obubi; esyonoono haba sisinyala ohukeendera alala naawe.

⁵ Abaandu b'esuunga haba sibanyala ohweema mu moni wao; ewe haba sodahiraho elalira abahola-mbi

⁶ Osihirisaanga abaandu balomaloma emboosi ch'obubacha; Omwaami haba saadaha abeedisi b'amabaanga neende ababacha.

⁷ Nae ese ohweema hu buheeri bwao buungi njia ohwiingira mu nyuumba yao, njia ohuhwiinamira mu nyuumba yao njoolerefu ni hwiisamo oluyaali.

⁸ Ewe Omwaami, nyimiriremo mu buluungifu bwao hulw'abasuku baange; ngololosere engira yao.

⁹ Olwohuba abasuku baange haba sibalomalomaanga obwadyeeri; emyooyo kyaabwe kibaasa sa ohusihirisa, emimiro kyaabwe chiahaaha koti eng'ani njikule, babachirisa neende enimi chaabwe.

¹⁰ Ewe Nasaae, leha esoni ch'ebyonoono byaabwe chibadoong'eho; leha abeene bakwe mu miteego kyaabwe; ohweema hu bibi byaabwe biingi basukune erwaanyi, olwohuba bahujeemera.

¹¹ Nae leha abo boosi abahunyoolamo obweyikamo basangaale. Leha beembeenge hulw'esangaalo; mani ewe, obakayirire, mani abo abaheera eliita lyao banyale ohuhuhwehoyeramo.

¹² Olwohuba ewe Omwaami niiwe oberesaanga abaluungifu ehabi; haandi niiwe obaheeraanga n'obahiingakirira koti engabo.