Esabbuli 48 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Siyooni, esiko sya Nasaae

¹ Omwaami muhunuufu haandi ahoyerwa ohufumisibwa mu siko sya Nasaae weefwe! Olugulu lwae lwoolerefu,

² olwaleeya bulai, nilwo esangaalo ly'esyaalo syoosi. Olugulu lwa Siyooni, oluli emukulu bweene, esiko sy'omutuki muhunuufu.

³ Mu nyuumba chaasyo Nasaae yeyekeese omweene koti niye obwiiruhiro bwasyo wadyeeri.

⁴ Olwohuba bone, abatuki bebuusiire alala, beechera alala ohusiseeta.

⁵ Nae nibasibona sa bati, batya muno, baachaaka ohuteengereha, mani baatimuha embiro;

⁶ obuti bwabadiirira eyo, balumwa koti omuhasi olumwa.

⁷ Baaba koti emeeri cha Tarusiisi chi muyaka kutula ebukwe kuwuucha.

⁸ Koti lu hwawulira, nilwo sa lu hubweene mu siko sy'Omwaami w'Obunyala, mu siko sya Nasaae weefwe, esiko si Nasaae aliinda endaalo choosi.

⁹ Hubaasa hu buheeri bwao butaakama, Ewe Nasaae, nihuli mu nyuumba yao njoolerefu.

¹⁰ Ewe Nasaae, koti eliita lyao lu liri, nilwo lu fuma yao yosi yichia ohwoola hu njakamo y'esyaalo. Omuhono kwao kwichuulemo ohuyiingira;

¹¹ leha olugulu lwa Siyooni lusangaale! Leha abahaana ba Yuda beehoye olweheenga yao y'emisaango yadyeeri!

¹² Mulambuule Siyooni, mani musyebodoohania, mubale eminaara kyasyo.

¹³ Mwehalirise bulai olukoba lwasyo, mubite mani muhalakanie ekoba kasyo; mani mukaniaayire olwiibulo lwiicha

¹⁴ muti wuno niye Nasaae, Nasaae weefwe emyaaka kyoosi. Niye ochia ohutwemiriramo endaalo choosi pe.