Esabbuli 47 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae mutuki muhunuufu ohiramo.

¹ Eng'we abaandu boosi, mupaame amahono neende esangaalo! Mukinie Nasaae nimweemba enyembo ch'esangaalo!

² Olwohuba Omwaami, ow'Aakulu Muno, atiisa, omutuki ahira obuhunuufu mu syaalo syoosi.

³ Yakera hwayiingira abaandu, mani hwaatuka ebyaalo byaabwe.

⁴ Yatulobolera ebyaalo by'ohumenyamo, omwehoyo kwa Yakobbo yi Nasaae yaheera.

⁵ Nasaae aniinire aakulu abaandu nibamufumia neende esangaalo, Omwaami aniinire aakulu nibamuubbira eturumbete.

⁶ Mweembere Nasaae enyembo ch'ohufumia, mweembe nimufumia! Mweembere omutuki weefwe enyembo ch'ohufumia, mweembe nimufumia!

⁷ Olwohuba Nasaae niye omutuki w'esyaalo syoosi; mweembe nimufumia neende esabbuli!

⁸ Nasaae atuka ebyaalo byoosi; Nasaae yehale hu sisaala syae syoolerefu sy'obutuki.

⁹ Abatuki b'ebyaalo bebuusire alala neende abaandu ba Nasaae wa Abburahamu. Olwohuba obunyala bwoosi hu syaalo bwa Nasaae; niye ohiramo obuhunuufu!