Esabbuli 45 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lwohu sidyaalo sy'omutuki odehiisye

¹ Omwooyo kwaange kwichuule ebilai by'ohukaniaaya; koti lu tekehera omutuki olweembo; olulimi lwaange luli koti ekalaamu y'omwaandiki mulai owetekeehe ohwandiika.

² Niiwe omulai ohiramo mu baandu boosi; byoolomaloma bilai bihaya; Nasaae yahuberesa ehabi ch'endaalo choosi.

³ Mu luyaali lwao neende amaani, weboye mu sibuno oluhoba luliho olugaanga, ewe ow'obunyala!

⁴ Mu bunyala bwao, chia mani oyiingire n'olwaanilira obwadyeeri haandi n'oliinda ebiindu bilai; leha omuhono kwao muluungi kweekese eby'amayia by'ohola!

⁵ Obusaale bwao bwooki bufumite emyooyo ky'abasuku b'omutuki abaandu boosi bahwiisamo oluyaali.

⁶ Esisaala syao sy'obutuki si Nasaae yahuberesa syohuyiindira emyaaka kyoosi. Endawusi yao y'obutuki y'obwadyeeri niyo.

⁷ Ewe waheera obuluungifu nae waasyuula obubi. Sakira Nasaae, Nasaae wao yahubaha amafuta amafuta k'esangaalo ohuhira abaandu basyo boosi.

⁸ Ebyefwaalo byao biwunya esing'aari sya miira neende esy'alobeera neende esya kasiiya. Mu madooho kasaatwa neende ameeno k'enjofu nimwo mubahweembera hu biriri ohuhusangaasa;

⁹ mu bahasi bahuberesa oluyaali mulimo abahaana b'abatuki; omutuki muhasi owefwaalire engubo ch'esaabbu ya Ofiri ahweemere hu muhono kwao muluungi.

¹⁰ Ewe muhaanang'ene, tekeeresa mani obaase hu bi mboola; yibirira abaandu bao neende abanaluyia bao;

¹¹ mani omutuki achia ohwekoomba obulai bwao. Nae koti lu ali omwaami wao, mwiisemo oluyaali.

¹² Abaandu ba Tiiro bachia ohuhuleetera ebiyaanwa, abaandu bahiramo obuyiinda

¹³ neende obuyiinda bukabuhaane. Omuhaana w'omutuki naali mu siseenge syae niyefwaalire engubo ching'enaang'ena ech'esaabbu;

¹⁴ ech'amakoondo maangi achia ohuyirwa eyiri omutuki, naali neende abahaana baasye bataamanyireho eby'abasaacha, nibamugooba mu bweeya.

¹⁵ Baleetwa neende esangaalo haandi nibehoya mani nibeengira mu dooho ly'omutuki.

¹⁶ Abaana bahalye obwaami bwa balaata yaabwe; mani wahabahole baaba abatuki mu syaalo syoosi.

¹⁷ Njia ohukera eliita lyao liisibwemo oluyaali neende abaandu b'endaalo choosi; sakira abaandu bachia ohuhufumia emyaaka kyoosi pe.