Esabbuli 42 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

ESITABO SYOHUBIRI Esaala y'omuundo oli mu buwaambe

¹ Koti lu mboongo yilumwaanga obuluwo bw'amaachi k'emyaalo kihulukusa, nilwo sa lu mwooyo kwaange kuhwekoomba, ewe Nasaae waange.

² Omwooyo kwaange kwekoomba Nasaae muno, Nasaae mulamu. Ndaheeche liina mani ndaaba mu moni wa Nasaae?

³ Esiro neende esideete amasika keeholere ebyohulya byaange, abasuku baange baandeebaanga buli siha bati, “Nasaae wao ali yeena?”

⁴ Buli lu njichulisa ebiindu bino, eholo yiingwichaanga sa mu nda: Njichulisa koti lu ndachichaanga neende esidiiyiha sy'abaandu, koti lu ndabeemiriraanga nihukeenda neende esiroonyo nihuchia mu nyuumba ya Nasaae, nihwiichuule esangaalo haandi nihweemba enyembo ch'ohweebasa, hwabechaanga abaangi hu sidyaalo.

⁵ Nae bulaanu, lwasiina engisa yinjichuule hu mwooyo, haandi lwasiina ndeeyendeherera? Handeesike Nasaae, olwohuba njia haandi ohumufumia, omuhoonyi waange,

⁶ haandi Nasaae waange. Engisa yi ndi hu mwooyo, sakira hwiichulisa ni ndi mu syaalo sya Yorodaani neende esya Hamoni, ni ndi hu lugulu lwa Misari.

⁷ Obusiba bw'amaachi bulaanga obusiba bwaasye; yi maachi kawoola nikeediha; Efwiinda chao choosi neende amayeengo biindehulukuuseho.

⁸ Esideete Omwaami yanjekesa obuheeri bwae butaakama; mani esiro hu nyale ohuba neende olweembo lw'ohweemba, niisaba Nasaae w'obulamu bwaange.

⁹ Mboolera Nasaae, olwaanda lwaange endi: “Lwasiina wunjibiirire? Lwasiina buli siha ndira hulw'abasuku baange baasaandya?”

¹⁰ Amanyeko kaabwe kaamaliremo amaani, abasuku baange baanduulira, nibemeeda ohundeeba bati, “Nasaae wao ali yeena?”

¹¹ Nae bulaanu, lwasiina engisa yinjichuule hu mwooyo, haandi lwasiina ndeeyendeherera? Handeesike Nasaae; olwohuba njia ohumufumia, omuhoonyi waange haandi Nasaae waange.