Esabbuli 41 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala yomu biha by'obulwaae

¹ W'ehabi oyo ochuunirwa abamanani! Ebidinyu nibimukwaaho, Omwaami aba achia ohumuwoniaanga;

² Omwaami amuliinda haandi yaamuberesa obulamu; amuberesa ehabi mu syaalo; haba safukiirira abasuku bae ohumutuka.

³ N'adataliire hu buliri, Omwaami amuliinda; mu bulwaae bwae, niiwe owonia obuchuuni bwae bwoosi.

⁴ Nae ese ndaboola endi, “Ewe Omwaami, ngwiire esisa; monie, olwohuba ndonoona mu moni wao!”

⁵ Abasuku baange baanomanomaho neende ehali-hali nibaboola bati: “Nae yahafwe liina, mani eliita lyae lyaahaya ohwiichulisibwa?”

⁶ Nae abaandu nibeecha ohumbona, balomaloma emboosi chitahoonya, nae mu myooyo kyaabwe bakoonyeresa ebyohuunomanomaho; mani nibatulao bati, nibachaaka ohusalaania ebindiiraho.

⁷ Abo boosi abataandaha beemonyesera ebindiiraho; baambaasirisira sa ebibi byoong'ene.

⁸ Baboola bati “Obulwaae bwae obwo haba sibwohuwona; haba saachia husiingira ohutula hu seero lyae elyo.”

⁹ Kata owasyaange mweene yi ndali nindeesika muno, oyo yihwalichaanga nae ebyohulya, niye owundekaluuhaanieho.

¹⁰ Nae ewe Omwaami, ngwiire esisa, mani wuusiingise, nyale ohubetuunga!

¹¹ Sino nisyo esinaanjekese siti wuundaha, abasuku baange nibatanyiingira.

¹² Nae ewe onahoonya olwohuba hola obwadyeeri, wundeere mu moni wao endaalo choosi.

¹³ Omwaami, Nasaae wa Yisiraeli, afumisibwe, ohutula endaalo choosi ohwoola endaalo choosi! Amiina, haandi Amiina!