Esabbuli 40 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lw'ohufumia.

Eyiri omweemberesi. Esabbuli ya Daudi.

¹ Ndeesimiirisa ni niinda Omwaami ohuhoonya; yatekeeresa mani yaawulira amaliro kaange.

² Yanyinulula ohutula mu buko, yaandusa mu madosi, mani yangeeng'a hu lwaasi, yoomiisa amakulu kaange yi nyemera.

³ Yanjekesa olweembo luyaaha, olweembo lufumia Nasaae weefwe. Abaandu baangi bachia ohubona sino mani batye, mani bachaake ohweesika Omwaami.

⁴ Oyo w'ehabi oweesika Omwaami, otakaluuhana yaachia eyiri ab'esuunga, eyiri abo abakota nibaloonda banasaae batali abadyeeri!

⁵ Ewe Omwaami Nasaae waange, omeedere ohutuholera eby'amayia byao neende ohutubaasaho; abulao onyala ohuhweekeraaniaho! Kata ndahateema ohubibala oba ohubilomalomaho, haba sibinyalihana ohubibala.

⁶ Ebiyaanwa bisaambwa neende ebiyaanwa biyaanwayo haba sobyekoomba; ohumalaho wamberesa ohutwi huwulira. Ebiyaanwa bisaambwa neende ebiyaanwa bimala omusaango ewe haba sobidaha daawe.

⁷ Sakira ndaboola endi, “Bona, mbano nduwo; ebilagiro byao yi ndi biri mu sitabo sy'Amalako biti;

⁸ sangaala ohuhola bi waheera, Ewe Nasaae waange; mwooyo kwaange.”

⁹ Ndakaniaaya emboosi yao endai y'obuwonia eyiri olwichuule lw'abaandu; bona, haba sinjakamangaho ohusilomaloma, koti lu omanyire, ewe Omwaami.

¹⁰ Haba sindawuleera neende amaani k'obuwonia bwao mu mwooyo kwaange, ndalomaloma ninjekesa obweesikwa bwao neende obuwonia bwao; ebidiira hu buheeri bwao butaakama neende obweesikwa bwao eyiri olwichuule lw'abaandu.

¹¹ Ewe Omwaami, otaakama ohungwiiraanga esisa, leha obuheeri bwao butaakama alala neende obweesikwa bwao biniindeenge buli ludaalo!

¹² Olwohuba ebidinyu bitabalihana bindebodoohaanie; ebyonoono byaange biimbitiriireho, ohwoola lu bingayiire kata ohubona; bingiiye muno bihiraho efwiiri lyohu mutwe kwaange obuungi; mbweeremo amaani.

¹³ Ewe Omwaami, fukiirira wumonie! Ewe Omwaami, yanguwaho wuhoonye!

¹⁴ Leha abasuku baange esoni chibadiire, haandi badiirirwe elalira esoni, abo abakiiya ohumalao obulamu bwaange; bakaluswe enyuma mani bamalwemo oluyaali!

¹⁵ Leha abo abanjaaraanga nibaboola bati, “Oyo ahoya sa atyo” esoni chibadiire!

¹⁶ Nae leha abo boosi abahukoonya beehoye haandi bahusaangaaliremo; leha abo abadaha obuwonia bwao bemeede ohuboolaanga bati, “Omwaami w'amaani!”

¹⁷ Nae ese mweene, ndi omumanani haandi ndaha obuhoonyi; mani Omwaami yambaasaho. Niiwe omuhoonyi waange, omuwonia waange; Ewe Nasaae waange, otahiinda daawe!