Esabbuli 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'engoloobe y'ohusaba obuhoonyi

¹ Ewe Nasaae omukayi waange, ngoboleengemo niihusaba! Nindali mu bidinyu, wahoonya. Ngwiire esisa, mani owulire esaala chaange.

² Eng'we abaandu, oluyaali lwaange lwahoole yeena ohudiirwa esoni? Mwahoole yeena ohuheeraanga emboosi chibulamo obuhoonyi, haandi ohukoonyeresaanga obubacha?

³ Nae manye muti Omwaami mweene yamala ohweyawuliramo abaandu bamutya; Omwaami awulira ese nimulaanga.

⁴ Nyoolera, nae otonoonaanga; baaseenge mu myooyo kyeeng'we nimweyaliise, mani mubuleera.

⁵ Yaaneenge ebiyaanwa bihoyera, mani mweesika Omwaami.

⁶ Baluwo abaandu baangi ababoola bati, “Eee, leha hubeeho bulai! Ewe Omwaami, tutingaale hooho neende emoni yao y'esisa!”

⁷ Esangaalo li wumbeere, eliri mu mwooyo kwaange liingi muno ohuhiraho ely'abo abali neende ebyohulya neende ebyohung'wa mu buungi.

⁸ Njia ohweyalisa aasi mani ngone endoolo ni ndi neende omuleembe; olwohuba ewe Omwaami niiwe weeng'ene onyala ohukera ndaamenya ataali obudinyu bwoosi.