Esabbuli 37 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enjakamo y'abaandu babi

Esabbuli ya Daudi.

¹ Oteyendehereraanga hulw'abaandu babi, oba onyoolera hulw'abahola-mbi!

² Olwohuba bachia ohwoomerera maangu koti obunyaasi, haandi bahoohe koti ebimera bibisi bihoohaanga mani bifwa.

³ Wesikeenge Omwaami, mani oholeenge ebilai; oba ochia ohubechaanga neende omuleembe hu syaalo.

⁴ Esangaalo lyao likonyeenge mu Omwaami, oba ochia ohuhuberesaanga bi mwooyo kwao kwekoomba.

⁵ Yomiiriraanga hu Omwaami; mweesikeenge, mani achia ohuhuhoonyaanga.

⁶ Achia ohuta alafu obuluungifu bwao, mani bwaaduhe koti omubasu kw'esideete.

⁷ Bechaanga omwomiifu mu moni wa Omwaami, mani oliindiriraanga sy'anahole niwesimiriise; otelalihiraanga abo abahulahulana mu ngeri chaabwe mbi, oba abo abooseresa ebibi bi batekeha ohuhola!

⁸ Lehaanga etima, mani webwaabe obwaalaba! Otelalihiraanga; sibulao esilai sy'onyoolamo.

⁹ Olwohuba ababi bachia ohusihiriswa; nae abo abeesika Omwaami bachia ohulya obusiha mu syaalo.

¹⁰ Nae mu biha biimbikiti muno, ababi haba sibachia ohubaao kata nabudiidi; kata wahakoonya yi bali nibamenya, haba siwahabanyoole daawe.

¹¹ Nae esyaalo syahabe esy'abaloonga, haandi abeene basangaalire mu myaandu miingi ataali omuundu obanyaasa.

¹² Ababi balya mu baluungifu olukwe, mani babatingaala neende etima nibeluma ebisinini;

¹³ nae Omwaami acheha-bucheha abahola-mbi, olwohuba amanyire ati oludaalo lwaabwe luli aambi ohwoola.

¹⁴ Ababi basoowolayo engaanga haandi baaleega obuyiingo, ohusihirisa abamanani neende abataali neende obuhoonyi, nibadaha ohumalao abaluungifu.

¹⁵ Olugaanga lwaabwe luchia ohufumita emyooyo kyaabwe kyeene, haandi obuyiingo bwaabwe buchia ohufuniha.

¹⁶ Esidiidi si muluungifu ali nasyo sihira ebiingi bi bahola-mbi bali nabyo.

¹⁷ Olwohuba ebilwaaniso by'abahola-mbi bichia ohufunakwa; nae Omwaami achia ohuliinda abaluungifu.

¹⁸ Omwaami aliindaanga abaandu babulaho omusaango, haandi obusiha bwaabwe bwohuyiindira endaalo choosi;

¹⁹ mu biha by'ebidinyu, haba sibahasaande, mu biha b'enjala, bahabe neende ebyohulya biingi.

²⁰ Nae ababi bachia ohusihirira; abasuku b'Omwaami bali koti oluyaali lw'abaayi, bahamao koti lu omwoosi kuduumuuha kuhamaangao mu bbaanga.

²¹ Abahola-mbi beeyola, nae haba sibatuunga, nae omuluungifu muwaani haandi mukabi;

²² olwohuba abo ba Omwaami aberesa ehabi bachia ohuba abeene syaalo, nae abo ba Omwaami abwaaba, bachia ohusihirira.

²³ Omwaami niye oweekesaanga omuundu mulai engira yohukeenderaho, haandi aliinda bulai omuundu amusangaasa.

²⁴ Kata bahakwa, haba sibadoong'a aasi, olwohuba Omwaami niye obahoonya mani yabasiingisa.

²⁵ Ohutula mubuyere bwaange ohwoola buti mu bukofu bwaange; sisiiri ohubonaho omuundu muluungifu niyebwaabirwe oba abaana bae nibesabirisa ebyohulya.

²⁶ Buli ludaalo omuundu mulai ahola ebiindu bilai haandi yeyosa, haandi abaana bae bamusaangaasa.

²⁷ Lehana neende ebibi, mani ohole ebilai; hw'onyale ohuyiindira endaalo choosi.

²⁸ Olwohuba Omwaami adaha ab'obwadyeeri; haandi haba saachia hujwaanga abamwesika. Omwaami aliindaanga abakololofu endaalo choosi, nae abaana b'abahola-mbi bachia ohusihiriswa.

²⁹ Abakololofu baachia ohunyoola esyaalo, mani bamenyeho endaalo choosi.

³⁰ Omuundu muluungifu alomaloma eby'amakesi, haandi olulimi lwae lulomaloma obuluungifu.

³¹ Amalako ka Nasaae wae kali mu mwooyo kwae; haandi sakatulaho nabudiidi.

³² Omuhola-mbi aliingirisa obakololofu, mani yaakonyeresa engeri yohumwiita.

³³ Nae Omwaami haba saachia ohuleha omulai mu bunyala bw'omuundu mubi, oba yamuleha ohuheengerwa omusaango kumuhire.

³⁴ Weesikeenge Omwaami, haandi oliindeenge amalako kae, mani achia ohuhuberesa oluyaali esyaalo sibe esyao; haandi ochia ohubona koti lu omuundu mubi asihiriswa.

³⁵ Ese ndabonaho omubi n'ahudumbaale, haandi niyeniniisye aakulu koti emiseengese kya Lebbanooni.

³⁶ Nae haandi nindakobola, mani bone, yaba n'ataaliwo daawe; ndamukoonya, nae ndahaya ohumunyoola.

³⁷ Wehaliirise omuundu abulaho omusaango, haandi obone omuundu mukololofu, olwohuba omuundu w'omuleembe anyoola abeechuhulu.

³⁸ Nae abahalaki b'amalako boosi baachia ohusihiriswa; olwiibulo lw'abahola-mbi luchia ohumalwao.

³⁹ Obuwonia bw'abaandu b'obuhoyera butula eyiri Omwaami; Omwaami niye obwiiruhiro bwaabwe mu biha by'ebidinyu.

⁴⁰ Omwaami abahoonya haandi abaabina; abaabina ohutula mu mahono k'abahola-mbi, mani yabawonia, olwohuba beeruhira yaali.