Esabbuli 36 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obubi bw'omuundu.

Eyiri omweemberesi. Esabbuli ya Daudi, omuhalaabani w'Omwaami.

¹ Esibi silomalomera omuhola-mbi mukati w'omwooyo kwae siti; hubulao ohwiisa oluyaali mu Nasaae kata nabudiidi.

² Olwohuba omweene yebachirisa mu moni wae mweene ati, esyonoono syae haba sisicha hufuumbulwa mani sisyuulwe.

³ Emboosi chitula muuhanwa wae choosi mbi haandi ch'obubacha haya; yaakama ohuhola ebiindu birimo amakesi haandi ebilai.

⁴ N'ali mu buliri, abaasaanga sa ohuhola ebibi byoong'ene; yoomiirira hu ngira chae mbi; sibulao esyonoono sya anyala ohuhaya.

Obulai bwa Nasaae

⁵ Ewe Omwaami, obuheeri bwao butaakama bwoolera elalira Muukulu, obweesikwa bwao bwoola hu bireesi.

⁶ Obuluungifu bwao buli koti engulu ndeeyi, ohuheenga hw'emisaango hwao hwoloberefu koti enyaanja njoloberefu muno; Ewe Omwaami niiwe onyala ohuwonia abaandu neende ebisolo.

⁷ Ewe Nasaae, obuheeri bwao butaakama bw'engaanga y'aakulu muno! Abaandu boosi beeruhiraanga yooli ohunyoola obweyikamo.

⁸ Balichaanga ebyohulya byomu nyuumba yao ebitawa, haandi obaberesaanga amaachi komu mwaalo kwao kuhusangaasa bang'wa.

⁹ Olwohuba mweewe nimwo omusoohaanga esulo y'obulamu; mu bulafu bwao nimwo muhubonera obulafu.

¹⁰ Eee, chiiririra ohweekesaanga abahumanyire obuheeri bwao butaakama, neende obuwonia bwao eyiri abo abali neende emyooyo miluungifu!

¹¹ Otakanya abaandu behuduumbasa baaseeta, oba omuhono kw'omuhola-mbi kwaambuuyisa.

¹² Eyo niyo yi bahola-mbi bakoneere aasi, basukuunwe aasi, haba sibanyala ohusingiira daawe.