Esabbuli 35 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba obuhoonyi.

Esabbuli ya Daudi.

¹ Ewe Omwaami yiingania abo abaanyiingania, lwaania abo abalwaana naange!

² Omwaami, bukula engabo neende ehuumba, osiingiremo ohuhoonya.

³ Bukula efumo neende omuuma olwaanie abasuku baange! Boolera omwooyo kwaange oti, “Niise Omuwoniaa wao!”

⁴ Leha abasuku baange bayiingirwe haandi badiirwe esoni abo abadaha ohumalao obulamu bwaange! Leha bakaluswe enyuma mani bayiingirwe abakoonya ohuholaho obubi!

⁵ Leha malaika w'Omwaami abadumuule, babe koti omuhuuchi ku muyaka kudumuula!

⁶ Leha engira chaabwe chibe ech'esiirima haandi ech'obuterere, Malaika w'Omwaami n'aboongaho.

⁷ Olwohuba bateka oluhaanda ohundiira ataali esifune; ataali esifune, bayaba obuko bati ngweemo baandiire.

⁸ Leha ohusihiriswa hubakweeho nibataamanyire! Haandi leha ehaanda chi bateka mu bweekisi chibadiire abeene; leha abeene bachikweemo basihirire!

⁹ Mani omwooyo kwaange kuchia ohusangaalira mu Mwaami, nikukinia obuwonia bwae.

¹⁰ Amakuumba kaange koosi kachia ohuboola kati, “Ewe Omwaami, abulao ohwekeraniaho, ewe onunula abakata ohutula mu mahono k'abo ababahira amaani, abakata neende ababula obuhoonyi obakayirira wabawonia abo abadaha ohubayaaya.”

¹¹ Abaandu babi basiingira mani baamubachira neende emboosi ch'obubacha; Baateeba ebiindu bi tamanyireho daawe.

¹² Baatungya ebibi mu bweyaango bw'ebilai; mani byamalamo amaani.

¹³ Nae nibaali nibalwaala, ese naange, ndefwaala ebigunia mani ndechuunia nimoonga enjala. Ndekongooya ninyinaamye omutwe aasi,

¹⁴ koti lu ndahadiirirwa esibeera eyiri omwiicha waange oba mwaanama; Ndakeenda nibita buli abuundu engisa niyindiirire koti omuundu olira ng'ina, ndagunguuna aasi mani ndaalira.

¹⁵ Nae ese nindakwa mu bidinyu, beebuusa mani baasangaala, beebuusa alala mani bandeekaluuhanira; abaandu ba ndali nitamanyireho bosi bemeeda ohusaandya;

¹⁶ bemeeda ohunduulira nibehoonyera emboosi mbi, nibeeluma ebisinini hulwaange.

¹⁷ Ewe Omwaami, wahewuunje-bwewuunja bino ohwoola liina? Monie ohutula hu baandu badaha ohunjiita, obulamu bwaange buwonie edalang'i chino!

¹⁸ Mani njia ohuhweebasa mu lwichuule lw'abaandu; njia ohuhufumia mu moni waabwe boosi.

¹⁹ Otaleha abasuku baange bandeehoyeraho, abo abasyuula ataaliho esifune syoosi.

²⁰ Olwohuba haba sibalomaloma emboosi chileeta omuleembe, nae echiyiingania abo abamenya nibataaliho obudinyu mu syaalo emboosi chaabwe choosi ch'obubacha.

²¹ Balebalebana muhanwa (nibaanomanomaho); nibaboola bati, “A-ha, A-ha! Hwabona neende emoni cheefwe cheene!”

²² Ewe Omwaami, sino osibweene, mani otabuleera sa! Ewe Omwaami, otaba eyale naange!

²³ Nae ewe Omwaami, siingira mani wuunjabine; Nasaae waange haandi Omwaami waange, siingira mani wuhoonye!

²⁴ Ewe Omwaami, Nasaae waange, heengere omusaango omuchanaakana neende obuluungifu bwao; mani otakanya abasuku baange bandeehoyeraho!

²⁵ Otakanya bachaaka ohulomaloma abeene-na-beene, nibaboola bati, “A-haa, mbao hwahanyoola esiindu si hubeere nihwekoomba!” Otakanya boola ohuboola bati, “Mbao humumalireo.”

²⁶ Abo abasangaalira ebidinyu byaange, lehe esoni chibadiire mani badoondobanire elalira! Lehe abo abaandehuduumbasiraho badiirwe esoni haandi bamalwemo oluyaali! Lehe abo abaandehuduumbasiraho badiirwe esoni haandi bamalwemo oluyaali! Abo ababeere nibaandehuduumbasiraho!

²⁷ Leha abo abekoomba hire omusaango, beembe nibehoya haandi basangaale, mani baboole endaalo choosi bati, “Omwaami w'amaani, oyo osangaalira obulai bw'omuhalaabani wae!”

²⁸ Mani oludaalo lwoosi njia ohulomaloma hu buluungifu bwae neende hu fuma yae.