Esabbuli 34 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO1 Njia ohukiniaanga Omwaami ebiha byoosi; njia ohumufumiaanga ataali ohwaakama. 2 Njia ohwehoyeraanga mu Omwaami; lehe abasaanda bawulire mani basangaale. 3 Eng'we mwiiche mufumie Omwaami, haandi lehe fweesi alala hukinie eliita lyae! 4 Ndekongooya Omwaami, mani yeechia yangobolamo, mani yamonia ebyo byoosi ebyali nibitiisa. 5 Tingaale eyiri Omwaami haandi musangaale; mani haba simwahadiirwe esoni. 6 Omumanani wuno yamwekongooya, mani Omwaami yamuwulira,, haandi yamuwonia mu bidinyu byoosi. 7 Malaika w'Omwaami yeebodoohania abo abamwiisamo oluyaali mani yaabawonia. 8 Mwebonereho abeene muti Omwaami mulai. Abo abamweesika mani beeruhira yi ali, bali neende ehabi! 9 Mwiise oluyaali mu Omwaami, eng'we aboolerefu bae, olwohuba abo abamwiisamo oluyaali babula esy'ohukoonya. 10 Obwaana bw'edalang'i busaanda enjala mani bwaabula esyohulya; nae abo abeesika Omwaami, abulao esiindu silai si yahabeema. 11 Baana baange, mwiiche mani mutekeerese, mbeekese ohwiisa oluyaali mu Omwaami. 12 Muundu siina odaha ohuba neende obulamu bulai, haandi ayiindira mani anyoole ebiindu bilai? 13 Mani liinda olulimi lwao luhaye ohulomaloma ebiindu bibi, haandi omunwa kwao kuhaye ohulomalomaho eby'obubacha. 14 Tula mu bubi, mani oholeenge ebilai; koonya omuleembe, mani womirireho. 15 Omwaami aliinda abaluungifu, haandi awulira amaliro kaabwe. 16 Omwaami haba s'atingaala bulai abahola-mbi, abona ati haba sibechuliswa mu syaalo. 17 Abaluungifu nibasaba obuhoonyi, Omwaami abawuliraanga, mani abawonia mu bidinyu byaabwe byoosi. 18 Omwaami ali aambi neende abo abeyendehereere, haandi awonia abefunaake mu myooyo. 19 Omuundu muluungifu abechaanga n'ebidinyu biingi muno; nae Omwaami amalaanga amuwonia mu bidinyu byae byoosi. 20 Amuliindangaa bulai muno; libulao ekuumba lyae kata lala elichia ohufunakwa. 21 Esibi sichia ohwiita ababi; haandi abo abatadaha abaluungifu bahasaande. 22 Omwaami anunulaanga obulamu bw'abahalaabani bae; abo boosi abamweesika haba sibahaheengerwe omusaango ohubahira. |