Esabbuli 33 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lw'ohufumia

¹ Eng'we abaluungifu musangaalire mu Omwaami! Olwohuba abaandu baluungifu bahoyere ohufumia.

² Mufumia Omwaami neende esiriri, mumweembere nimuhubba obuhana bw'eesya ehumi!

³ Mumweembere olweembo luyaaha, muhubbe bulai obuhana, neende amakono k'aakulu.

⁴ Olwohuba emboosi y'Omwaami nuungifu niyo; haandi bi yahola byoosi byeesikwa.

⁵ Omwaami adaha ob'obuhoyera neende obwadyeeri; esyaalo syeechulamo obuheeri bw'Omwaami butaakama.

⁶ Omwaami yaloonga ekulu neende emboosi yae, ebiri muukulu byoosi byaloongwa neende emboosi yae.

⁷ Yabuusa alala amaachi komu nyaanja mani kaaba koti akomu syoongo; yaata amaachi komu busiba mu sibiihiro syako.

⁸ Leha esyaalo syoosi sitye Omwaami, lehe abaandu bomu syaalo boosi bamwiisemo oluyaali!

⁹ Olwohuba yalomaloma, mani esyaalo syaabaao; yalagira mani syaabonehana.

¹⁰ Omwaami amalao bi byaalo bipaanga; haandi yadoondobania endekeha ch'abaandu.

¹¹ Nae bi Omwaami atekeha biyiindira endaalo choosi, ebibaaso by'omwooyo kwae by'emyaaka kyoosi.

¹² Esyaalo siri neende Nasaae koti Omwaami wasyo sy'ehabi, abaandu ba yadoola ohuba abae!

¹³ Omwaami alingaala aasi n'ali Muukulu, mani yaabona abaandu boosi;

¹⁴ atingaala niyehaale hu sisaala syae sy'obutuki mani yaabona abali hu syaalo boosi.

¹⁵ Niye eyaloonga emyooyo kyaabwe boosi haandi niye owehaliirisa ebiholwa byaabwe byoosi.

¹⁶ Omutuki haba s'awona olwohuba ali neende eye ly'amaani; oba omulwaani yewonia neende amaani kae maangi.

¹⁷ Efaraasi sinicho echikera mwaahira eye, haandi amaani kachio maangi sikawonia.

¹⁸ Bone, Omwaami abona abamwiisamo oluyaali, abo abeesika obuheeri bwae butaakama,

¹⁹ abawonie bahaye ohufwa, haandi abaliinda babe abalamu mu biha by'enjala.

²⁰ Efwe huliinda Omwaami; olwohuba niye amaani keefwe haandi engabo yeefwe.

²¹ Eee, efwe husangaalira mu Omwaami, olwohuba hweesika eliita lyae lyoolerefu.

²² Ewe Omwaami, koti lu huhweesika, leha obuheeri bwao butaakama budoong'e naafwe.