Esabbuli 32 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohweyolobya neende ohuleherwamo.

Esabbuli ya Daudi. Masikili.

¹ Ali neende ehabi, oyo yi bibi byae bileherwamo, owooswaho esyonoono syae.

² Omuundu oyo w'ehabi yi Omwaami atanyoolaho omusaango, haandi otaali neende ohwebachirisa mu mwooyo kwae.

³ Nindali nisiihayiire hu bibi byaange, ndaweeramo elalira amaani nindekanyiirisa oludaalo lwoosi.

⁴ Olwohuba esiro neende esideete, wasaandya; amaani kabweeramo elalira, koti amaachi kahama mu siminyu.

⁵ Mani ndeecha ndahweyolobirisira ebyonoono byaange, haba sindahukisa ebyonoono byaange; ndaboola endi, “Njia ohweyolobya ebyonoono byaange eyiri Omwaami”; mani waandeheramo ebyonoono byaange.

⁶ Mani sakira buli muundu otya Nasaae leha ahwekongoyeenge; mu biha by'ebidinyu, amasira haba sikachia ohumwoolaho.

⁷ Niiwe obweyikamo bwaange, niiwe owungayiriraanga mu bidinyu; wuundebodoohaanie neende obuwonia.

⁸ Omwaami aboola ati “Njia ohuhukerakira haandi hweekese, engira y'ohoyere ohudiira; njia ohuhayisiraho emoni nihukerakira.”

⁹ Mutaba koti efaraasi oba esuhiri njere, ebibulamo amakesi, by'otuka neende esyuuma mu lyoolu neende oluhoba mu sirifu, ataali ao, sibinyala ohufukiirira by'odaha.

¹⁰ Abahola-mbi basaanda muno; nae abo abeesika Omwaami, obuheeri butaakama bubebodoohania.

¹¹ Eng'we abaluungifu, mwehoyere mu Omwaami haandi musangaale, eng'we mweesi ab'omwooyo muluungifu, muhuumule hulw'esangaalo!