Esabbuli 30 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohweebasa Nasaae

Esabbuli ya Daudi. Olweembo lweembwa nibaberesa Nasaae Enyuumba yae.

¹ Njia ohuhufumia ewe Omwaami, olwohuba wumoniisye, haandi haba s'okanyire abasuku baange baandehoyeraho.

² Ewe Omwaami Nasaae waange, ndahulirira wuhoonye, mani mbao wumoniisye.

³ Ewe Omwaami, waandusa emakoombe, waamonia ohuchia emakoombe, mani waangobosamo obulamu.

⁴ Eng'we aboolerefu b'Omwaami, mweembe nimumufumia, haandi mweebase eliita lyae lyoolerefu.

⁵ Olwohuba etima lyae liwa maangu muno, nae esisa syae sy'endaalo choosi. Mu siro, ohulira hunyala ohubao, nae obwiire nibuhya, esangaalo likobolaangao.

⁶ Nae ese, nindali bulai, ndaboola endi, “Siinja ohudengaanaho kata nabudiidi.”

⁷ Mu sisa syao, ewe Omwaami, wunyemeeseo ndomiira koti olugulu lugumu; nae niwandeekisa, ndeecha ndeelarihira muno.

⁸ Ewe Omwaami, niiwe yi ndalirira; haandi ndaahwekweeda endi wuhoonye:

⁹ “Ngaanga siina y'onanyoole ese niifwa, niinjia emakoombe? Abafu bali emakoombe banyala ohuhukinia? Banyala ohufumia obwadyeeri bwao?

¹⁰ Ewe Omwaami, tekeeresa mani wuungwiire esisa! Ewe Omwaami, hoonye!”

¹¹ Okaluhaanie amaliro kaange kaaba omweehoyo; wuundusireho ohwewuunamira mani waanjichusa esangaalo,

¹² sakira haba siinjia ohubuleera, nae njia ohuhufumia. Ewe Omwaami Nasaae waange, njia ohuhweebasaanga endaalo choosi.