Esabbuli 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohweesika Omwaami mu bidinyu

Esabbuli ya Daudi, n'amalire ohwiiruha Abbusalomu omwaana wae.

¹ Ewe Omwaami, abasuku baange beengiiye muno! Abaandu baangi bali ohutulayo nibaseeta;

² bali ohunomanomaho nibaboola bati, Nasaae haba saachia ohumuhoonya daawe.

³ Nae ewe Omwaami, niiwe engabo yiindebodoohaanie; niiwe okeraanga niinyiingira ebiita, haandi niiwe owuungumianga.

⁴ Ndiriraanga muno Omwaami yahoonye, mani yaangobolamo naali hu sigulu syae syoolerefu.

⁵ Ndeeyalisaanga aasi mani ngona endoolo, haandi simuha olwohuba Omwaami niye owuniindaanga.

⁶ Haba siindichaanga obuungi bw'abasuku baandebodoohania hu buli lwaande.

⁷ Ewe Omwaami, siingira wiichie! Ewe Nasaae waange, monie! Olwohuba niiwe oseenakiraanga abasuku baange, obaleha nibaweeremo amaani kanyala ohuunjosaho obusuku.

⁸ Obununuli butulaanga eyiri Omwaami, sakira ahoya yaaberesa abaandu bae ehabi!