Esabbuli 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ekono ly'Omwaami mu muyaka

¹ Eng'we ebiloonge byo Muukulu mufumie Omwaami, mukinie oluyaali neende amaani k'Omwaami.

² Mufumie eliita ly'Omwaami ly'oluyaali; mwiinamire Omwaami mu ngeri njoolerefu.

³ Ekono ly'Omwaami liwulirihanira hu maachi; Nasaae w'oluyaali yaaduluhana, liri koti ohwaaduluhana huli mu nyaanja hoongo.

⁴ Ekono ly'Omwaami ly'amaani, ekono ly'Omwaami ly'oluyaali lw'amaani.

⁵ Ekono ly'Omwaami lifunaka emituumba, Omwaami afunaka emituumba kya Lebbanooni.

⁶ Omwaami akera Lebbanooni nisiduumakira koti emoosi, neende Sirioni koti esurusi njere.

⁷ Ekono ly'Omwaami limesa-mesa koti enjeserye ch'omuliro.

⁸ Ekono ly'Omwaami lidengaania esiparara, Omwaami adengaania esiparara sya Kadesi.

⁹ Ekono ly'Omwaami likera emisaala kyamwo nikiwuuma, haandi lihuuhumula amasaafu koosi ohutula hu misaala; haandi mu nyuumba yae, buli siindu silira nisiboola siti, “Oluyaali!”

¹⁰ Omwaami yehaale n'atuka omuhula kw'amaachi; Omwaami yehaale koti omutuki endaalo choosi.

¹¹ Lehe Omwaami aberese abaandu bae amaani! Lehe Omwaami aberese abaandu bae ehabi neende omuleembe!