Esabbuli 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omutuki muhunuufu.

¹ Esyaalo neende ebiindu bisirimo byoosi by'Omwaami nibyo, esyaalo neende abaandu basimenyamo;

² Omwaami niye owasita hu nyaanja, niye owasyomiisa hu myaalo.

³ Wiina mweene ohoyera ohuniina hu sigulu sy'Omwaami? Wiina mweene ohoyera ohweema mu bwiihalo bwae bwoolerefu?

⁴ Niye oyo oholaanga ebiindu bilai haandi oli neende omwooyo mulai. Oyo owuteenamiraanga ebiloongaloongwe, haandi owutechubaanga eby'obubacha.

⁵ Sakira achia ohunyoola ehabi ohutula eyiri Omwaami, haandi Nasaae achia ohumuhola omwoolerefu mani amuwonie.

⁶ Luno nilwo olwiibulo lu abo abamukoonyaanga, abakoonyaanga ohubona Nasaae wa Yakobbo.

⁷ Eng'we ebiruwa, mwiikulweo! Mwiikulweo eng'we enjiki hale! Leha Omutuki w'oluyaali yeengire.

⁸ Omutuki w'oluyaali niye wiina? Niye Omwaami w'amaani neende ow'obunyala, Omwaami w'obunyala w'amaye!

⁹ Eng'we ebiruwa, mwiikulweo! Mani mwiikuheo, eng'we enjiki hale! Leha Omutuki w'oluyaali yeengire.

¹⁰ Omutuki w'oluyaali niye wiina? Niye Omwaami w'amaye, niye Omutuki w'oluyaali!