Esabbuli 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lwa Daudi lw'ohuyiingira

¹ Ndahuheera muno Omwaami, ewe amaani kaange.

² Omwaami niye olwaanda lwaange, niye obweyikamo bwaange, haandi niye omuwonia waange, Nasaae waange, olwaanda lwaange, niye yi nyoolamo obweyikamo, niye engabo yaange neende olwiika lw'obuwonia bwaange, niye amaani kaange.

³ Omwaami ahoyera ohufumisibwa, mani yaamonia ohutula hu basuku baange.

⁴ Amasira k'ohufwa kali nikandebodoohaania, amafwiinda k'ohusihirisa kaambitaho;

⁵ amasira k'ohufwa kandeboyokanieho, emiteego ky'ohufwa kiseeta.

⁶ Mu bidinyu byaange, ndalirira Omwaami; ndalirira Nasaae waange mani yahoonya. Omwaami yawulira ekono lyaange naali mu bwiihalo bwae bwoolerefu, mani amaliro kaanga kamwoolaho.

⁷ Mani esyaalo nisiteengereha haandi nisidengaana; engulu chosi chateengereha ohwoola hu bwaalo bwacho mani nichidengaana olwohuba Nasaae yaba n'anyoleere.

⁸ Omwoosi kwaniooha nikutula mu moolu kae, neende omuliro kusihirisa kwaaduha nikutula muhanwa wae; amaanda kaniooha kaanyusa enjeserye nichimutulamo.

⁹ Yataandula ekulu mani yeeha aasi; esiirima sidiraane syali aasi w'amakulu kae.

¹⁰ Yeeruhira hu Abakerubbi, mani yaabburuha; yeechia bwaangu muno n'ali hu mbaya ch'omuyaka.

¹¹ Yahola esiirima ohuba esyebwiiho syae, ebireesi bimali bisito byamwebodoohania.

¹² Olumyesu luli mu moni wae, lwatulamo amakina k'efula neende amaanda k'omuliro ebyeeha aasi nibibita mu maleesi mamali.

¹³ Haandi Omwaami yaaduluhanira Muukulu, haandi ekono ly'oyo oli Aakulu Muno lyawuliirihana, neende amakina k'efula neende enjeserye ch'amaanda k'omuliro.

¹⁴ Mani yaalasa obusaale bwae n'abasalaania; yahosa emesu mani beeruha.

¹⁵ Mani emihoosi ky'enyaanja kyabonehana, obwaalo bw'esyaalo bwatuumbuha, ewe Omwaami niwaalabira abasuku bao, n'obabuluulira mu bwaalaba bwao.

¹⁶ Omwaami yeyeneeresa ohutula aakulu mani yandiira, Yaanjabina ohutula mu maachi k'olusiba.

¹⁷ Yamonia ohutula hu musuku waange w'amaani; haandi ohutula eyiri abo abasyuula; olwohuba bali ab'amaani muno ohuuhira.

¹⁸ Baseeta ni ndi mu bidinyu; nae Omwaami niye owaangaya.

¹⁹ Yaandusa yaanda alafu; yaamonia olwohuba yasangaalira.

²⁰ Omwaami yaangaba omukabo ohweema hu buluungifu bwaange; olwohuba ndali nimbula omusaango, Omwaami yamberesa ehabi.

²¹ Olwohuba ese ndaliinda amalako k'Omwaami, haandi haba sindahola esyonoono mani ndaatula hu Nasaae waange.

²² Olwohuba amalako kae koosi kali mu moni waange, haandi situlaangaho hu bilagiro byae.

²³ Haba sindali neende omusaanga mu moni wae, haandi ndeliinda omweene ndaahaya ohwonoona.

²⁴ Mani sakira Omwaami yaaberesa ehabi ohweema hu buluungifu bwaange, ohweema hu butaba neende omusaango hwaange mu moni wae.

²⁵ Eyiri omweesikwa, Omwaami wesi weyekesaanga koti omweesikwa; haandi eyiri omuundu obulaho omusaango, wesi weyekesaanga koti obulaho omusaango;

²⁶ eyiri omwoolerefu, wesi weyekesaanga koti omwoolerefu; nae eyiri omuhyaamu, weyekesaanga koti omwaalaba.

²⁷ Olwohuba ewe owonia abaloonga; nae abehuduumbasa obeesa aasi.

²⁸ Eee, niiwe owumberesaanga obulafu; Omwaami Nasaae waange niye omalaangao esiirima syaange.

²⁹ Eee, ni ndi naawe nyala ohuyiingira eye; haandi ni ndi neende Nasaae waange nyala ohuhalaka olukaka.

³⁰ Nasaae wuno, engira yae njoolerefu niyo; esisuubise sy'Omwaami syadyeeri; Nasaae niye engabo y'abaandu beeruhira yaali.

³¹ Olwohuba Nasaae niye Omwaami yeeng'ene; haandi Nasaae yeeng'ene niye olwaanda lweefwe.

³² Nasaae owamberesa amaani, haandi niye owanderesera engira yaange.

³³ Yakera amakulu kaange kaaba ak'amaani koti amakulu k'enyuma k'emboongo, haandi yaaniinda bulai ni ndi hu ngulu.

³⁴ Nasaae yaanjekesa ohulwaana, mani ndaanyala ohufuumba oluyiingo lw'amaani neende amahono kaange.

³⁵ Ewe Omwaami waamba engabo y'obuwonia bwao, haandi wuusiirire neende omuhono kwao muluungi, mani obuhoonyi bwao bukerere ndaaba omuhunuufu.

³⁶ Waniinda ndaahaya ohudiirwa, mani ndaahaya ohuterera ndaakwa aasi.

³⁷ Ndoonga hu abasuku baange mani ndaabanyoola; mani ndabasihirisa hu ndeemao ndaakobola.

³⁸ Ndabafumita-fumita mani baahaya ohusiingira beema; ndaabayiingira baaba aasi mu makulu kaange.

³⁹ Olwohuba niiwe owumberesa amaani k'ohulwaana; niiwe okera ndayiingira abasuku baange.

⁴⁰ Niiwe okera abasuku baange nibaanjiruha; haandi abaandu baasyuula ndabasihirisa.

⁴¹ Balira nibadaha obuhoonyi, nae yabulao obawonia, balirira Omwaami, nae haba siyabakobolamo.

⁴² Ndabaswaaka, ndaabanyuhuula badumuuha koti olufu mu mboo; ndabasenakira baaba koti amadosi kali hu ngira.

⁴³ Waamonia ohulwaanakana neende abaandu bajeemu; wakera ndaaba omwimirisi w'ebyaalo; abaandu ba ndali ningoterwe beecha baahalaabanira.

⁴⁴ Nibawulira ebindiiraho bati, mani nibaanjisamo oluyaali; abateende bechaanga nibandeboyaho.

⁴⁵ Abateende bawaamo omwooyo, mani beekisulaangayo mu bwiihalo bwaabwe nibateengereha.

⁴⁶ Omwaami aliwo; haandi omuliindi waange afumisibwe, haandi Nasaae omuwonia waange akinisibwe.

⁴⁷ Nasaae niye owakera ndayiingira mani yaabata mu bunyala bwaange;

⁴⁸ niye owaamonia abasuku baange; eee, niiwe owakera ndayiingira abasuku baange; niiwe owaamonia waandusa mu abaandu baalaba.

⁴⁹ Sino sichia ohukera hufumie mu byaalo ewe Omwaami haandi nyembe efuma yao.

⁵⁰ Nasaae akera omutuki wae n'ayiingira muno, haandi yeekesa obuheeri bwae buungi eyiri omudoole wae, eyiri Daudi neende abeechuhulu bae endaalo choosi pe.