Esabbuli 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'omuundu obulaho omusaango

¹ Ewe Omwaami, wulira ohulira hwaange niisaba wuuholere obwadyeeri! Tekeeresa esaala yaange yitaalimo obubacha!

² Niiwe ochia ohuheengera omusaango mubwadyeeri. Leha ewe omweene obone esihoyera!

³ Noteema waabona omwooyo kwaange, niwiicha yi ndi esiro, niwundeema, ochia ohunyoola oti mbulamo esyonoono; omunwa kwaange kubulamo esyonoono.

⁴ Ohukeraania neende ebiholwa by'abaandu baandi, ebitachianakana neende ebilagiro byao, ese ndebwaaba engira ch'obwaalaba.

⁵ Ndoomiirira ohukeenderaanga mu mihoosi kyao, mani siichitulaangaho kata nabudiidi.

⁶ Ewe Nasaae, hwekweeda olwohuba niiwe ochia ohuwulira amaliro kaange. Ngwiire esisa mani owulire amaliro kaange.

⁷ Yekesa obuheeri bwao bw'amaani; ewe omuwonia w'abaandu bakoonya obweyikamo hu muhono kwao muluungi nibeeruha abasuku baabwe.

⁸ Niinde koti lu wahaliinda emoni yao; ngise mu mbaya chao,

⁹ wumonie ababi bangiiya, abasuku baange babi muno bandebodoohaanie.

¹⁰ Babula esisa mu myooyo kyaabwe; balomaloma nibadyaabuha.

¹¹ Bangiiya buli yi njiira; bulaanu bamalire ohundebodoohania; beetekeehe ohungwiisa aasi.

¹² Bali koti edalang'i yidaha ohubwaasula, koti edalang'i njere yebonderera niyeekisire.

¹³ Ewe Omwaami, siingira! Seeta abasuku baange obayiingire! Monie neende olugaanga lwao ohutula mu basuku,

¹⁴ ewe Omwaami, monie abasaacha bano neende omuhono kwao, monie abasaacha ba omukabo kwaabwe kuli mu bulamu bwomu syaalo muno. Leha banyoole ohusaanda hu wabatekehera; leha abaana baabwe basaande ohuhirahoo; leha ohusaanda huundi hudoong'ere abeechuhulu baabwe!

¹⁵ Nae ese, njia ohuhubona mu buluungifu; nisiingira njia ohusangaala nihubona koti lu oli.