Esabbuli 147 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Mu hukinia Nasaae ow'Obunyala bwoosi

¹ Kinie Omwaami! Silai ohweemba nihukinia Nasaae weefwe; olwohuba w'esisa haandi ahoyerwa ohukinisibwa.

² Omwaami haandi ali ohwoombaha Yerusalemu buyaaha; abuusa alala Abaisiraeli basalaana.

³ Awonia abawaamo omwooyo haandi aboya amakoonjo kaabwe.

⁴ Omwaami amanyire obuungi bw'eng'ining'ini, choosi achiberesa ameeta kachio.

⁵ Omwaami weefwe muhunuufu haandi w'obunyala; haandi amakesi kae haba sikapiimiha.

⁶ Omwaami asiingisa abaloonga, mani n'afwiinyirira aasi abahola-mbi.

⁷ Mweembe Omwaami nimumweebase; hubbire Nasaae weefwe enyembo ch'obuhana.

⁸ Oyo niye obwiiha amaleesi hu kulu; haandi otekehera esyaalo efula, amesa obunyaasi hu bigulu.

⁹ Omwaami oberesa ebisolo ebyohulya byabyo neende obubbiichu budoto nibulira.

¹⁰ Esangaalo lyae haba siriri mu maani k'efaraasi, oba mu ye okeendera hu makulu;

¹¹ nae Omwaami asangaalira abo abamwiisamo oluyaali, neende abo abeesika obuheeri bwae butaakama.

¹² Ewe Yerusalemu, kinia Omwaami! Ewe Siyooni, kinia Nasaae wao!

¹³ Olwohuba niye owomiisa ebiruwa byeeng'we; haandi abaandu bao bahulimo ababeresa ehabi.

¹⁴ Omwaami aleeta omuleembe hu njaho chao; ahwiikusa neende engaano yihiramo obulai.

¹⁵ Omwaami aberesa esilagiro syae hu syaalo, mani sy'alagira nisiholwa bwaangu muno.

¹⁶ Aberesa amakina k'efula malafu muno, abakala amakina k'efula kaaba koti olufu.

¹⁷ Omwaami aleeta amakina k'efula koti obuhuhumuha; mani yibula omuundu onyala ohwesimiirisira obunyifu obwo!

¹⁸ Alagira, amakina k'efula ako kasaanguluha; haandi aleeta omuyaka, mani amaachi nikachaaka ohuhulukusa.

¹⁹ Emboosi yae ayiberesa aba Yakobbo, amakerako kae neende ebilagiro byae abyeekesa Yisiraeli.

²⁰ Esyo haba s'asiholeraanga ebyaalo biindi daawe; haba s'abyekesaangaho ebilagiro byae. Kinie Omwaami!