Esabbuli 146 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Mu hukinia Nasaae omuwonia

¹ Kinie Omwaami! Ewe obulamu bwaange, kinie Omwaami!

² Njia ohukiniaanga Omwaami mu bulamu bwaange bwoosi; njia ohweembaanga ohumukinia Nasaae waange nisisiiri omulamu.

³ Mutesikaanga abatuki; mutesikaanga omuundu yeesi, olwohuba sibulao sya anyala ohuhoonya.

⁴ N'akwiisa omwooyo, n'akobola mu loba mu yatula; hu ludaalo lweene olwo, bi yatekehaanga nibisihirira.

⁵ W'ehabi oyo ohoonywa neende Nasaae wa Yakobbo, haandi oweesika Omwaami Nasaae waabwe,

⁶ owaloonga ekulu neende esyaalo, enyaanja, neende ebibirimo byoosi, aliinda obweesikwa bwae endaalo choosi.

⁷ Abo abafwiinyirirwa abaheengera omusaango mubwadyeeri; aberesa abali enjala ebyohulya. Omwaami aboolola ababoye

⁸ Omwaami aliimbusa emoni ch'abawofu. Asiingisa abakwiire; Omwaami adaha abaluungifu.

⁹ Omwaami aliinda bawalukeenda, ahoonya abahasi bafwiire neende bamulehwa, nae asihirisa ebiholwa by'abahola-mbi.

¹⁰ Omwaami anatukaanga endaalo choosi. Ewe Siyooni, Nasaae wao anatukaanga endaalo choosi. Kinie Omwaami!