Esabbuli 145 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lw'ohukinia

¹ Njia ohulaangirira obuhunuufu bwao, ewe Nasaae waange haandi omutuki waange; Njia ohuhukinia endaalo choosi pe.

² Njia ohuhukiniaanga buli ludaalo; njia ohuhweebasaanga endaalo choosi pe.

³ Omwaami muhunuufu niye haandi akinisibwe muno, olwohuba obuhunuufu bwae haba sibuwaayo daawe.

⁴ Bi wahola bichia ohufumisibwa ohutula hu mase malala ohwoola hu kaloondaho; boosi bachia ohulaangirira ebiholwa byao by'amaani.

⁵ Bachia ohulomaloma hu luyaali lwao neende hu buhoongo bwao, naange ese njia ohubaasa hu biholwa byao biwukisa.

⁶ Abaandu bachia ohulomalomaanga hu biholwa byao biwukisa, naange ese njia ohulaangirira obuhunuufu bwao.

⁷ Bachia ohukanaanga hu buheeri bwao butaakama buungi mani beemba mu kono ly'aakulu obuluungifu bwao.

⁸ Omwaami mulai haandi w'esisa, ahiinda ohunyoolera, haandi w'obuheeri butaakama.

⁹ Omwaami aholera ebilai buli muundu, haandi akwiira esisa ebyo byoosi bi yaloonga.

¹⁰ Ewe Omwaami, ebiloonge byao byoosi bichia ohuhukiniaanga, haandi abaandu bao boosi bachia ohuhufumiaanga.

¹¹ Bachia ohulomalomaanga hu luyaali lw'obutuki bwao haandi hu bunyala bwao,

¹² hu buli muundu amanye ebiholwa byao biwukisa neende oluyaali lw'obuhoongo lw'obwaami bwao.

¹³ Obutuki bwao bw'endaalo choosi, haandi oli omutuki endaalo choosi pe. Omwaami mweesikwa mu byoosi bi yasuubisa, haandi w'esisa mu biholwa byae byoosi.

¹⁴ Omwaami ahoonya abali ohukwa; haandi asiingisa abakwiire.

¹⁵ Ebiindu bilamu byoosi bitingaala ewe, mani n'obiberesa ebyohulya mu biha bihoyera.

¹⁶ Obiberesa ebibimala bulai mani weekusa obwekoombi bwa buli siindu silamu.

¹⁷ Omwaami muluungifu niye mu buli siahola, haandi w'esisa mu byoosi bi ahola.

¹⁸ Ali aambi neende abo abamulirira, abo abamulirira mubwadyeeri.

¹⁹ Abamwiisamo oluyaali boosi abaholera si bekoomba; haandi awulira amaliro kaabwe mani yaabawonia.

²⁰ Aliinda boosi abamudaha, nae asihirisa abahola-mbi.

²¹ Njia ohukiniaanga Omwaami endaalo choosi; mani lehe ebiloonge byae byoosi bikinie eliita lyae lyoolerefu endaalo choosi pe.