Esabbuli 143 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba obuhoonyi

¹ Omwaami, wulira esaala yaange; tekeeresa ohusaba hwaange! Ngobolemo olwohuba oli omweesikwa haandi omuluungifu!

² Otaheengera omuhalaabani wao omusaango; olwohuba abulao omuundu muluungifu mu moni wao.

³ Omusuku waange angiiya, amalire ohuunyiingira, yandeere mu siirima, mani ndi koti abo abamala ohufwa hale.

⁴ Mani sakira ndi aambi ohufwa; mbwereeremo elalira amaani.

⁵ Njichulisa endaalo cha hale; mbaasirisa hu biindu byoosi bi wahola, ndeeyichulisa hu biholwa byao.

⁶ Siingisa aakulu amahono kaange yooli. Omwooyo kwaange kuhulumirwa enjala, koti eloba lyoomerera.

⁷ Ewe Omwaami, yaanguyaho ongobolemo! Mbwaamo amaani! Otaandekisa daawe, haye ohuba koti abo abeehirira emakoombe.

⁸ Leha buli chuli mbulire obuheeri bwao butaakama, olwohuba niiwe yi ndeesika. Ndagiirire engira yihoyere ohudiira, olwohuba omwooyo kwaange kusiingisiire yooli.

⁹ Njiruhiire yooli, ewe Omwaami nunule wuunduse hu basuku baange.

¹⁰ Njekese ohuhola by'odaha; olwohuba niiwe Nasaae waange! Niiwe ow'omwooyo bulai, njekese engira ngololofu.

¹¹ Ewe Omwaami, liinda obulamu bwaange koti lu wasuubisa. Koti lu oli omulai, nduse mu bidinyu!

¹² Mu buheeri bwao butaakama, sihirisa abasuku baange, mani omaleo abo boosi abasaandya, olwohuba ndi omuhalaabani wao.