Esabbuli 141 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKOEsaala y'engoloobe 1 Ewe Omwaami, hulirira; wanguyaho wiichie yi ndi! Tekeeresa owulire nihulirira! 2 Leha esaala yaange yinioohe koti obubbaani mu moni wao, haandi ohusiingisa aakulu amahono kaange hube koti esiyaanwa sy'engoloobe. 3 Ewe Omwaami, liinda omunwa kwaange, buumba eminwa kyaange. 4 Hoonye haye ohwekoombaho ohuhola esibi syoosi, ohuhayira hu biholwa bibi haandi haye ohweyambaaniaho hu bahola-mbi; leha haye ohulyaaho hu bidyaalo byaabwe. 5 Leha omuundu mulai yasaandye oba yanjolobye neende esisa, nae haba sifukiirira oluyaali luumbereswa neende abahola-mbi; olwohuba buli ludaalo mu saala chaange, nyiingania ebiholwa byaabwe bibi. 6 Nae abeemirisi baabwe nibahasukunwe aasi nibaanulwa hu nyaanda ndeeyi, ao niwo yi baandu bachia ohumanyira bati emboosi chaange chiri echadyeeri. 7 Amakuumba kaabwe kasaasakulilwe hu mulyaango kw'emakoombe, koti lu emba y'eloba lirimirwe yi sasaakuha niyisukunwa aasi. 8 Ewe Omwaami Nasaae, ese hutingaala haandi hweesikire; niiwe obwiiruhiro bwaange, otaandeha ndadoong'a nimbula owuuhoonya! 9 Niinde hae ohukwa mu miteego chibaandeka, neende ehaanda ch'abahola-mbi. 10 Leha abahola-mbi baambye mu miteego chaabwe echo nae ese mone ataali esidinyu syoosi. |