Esabbuli 119 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako k'Omwaami

¹ Bali neende ehabi abo ba bulamu bwaabwe bubulaho esyonoono, abaloondakana neende amalako k'Omwaami.

² Bali neende ehabi abo abaliinda ebilagiro byae, abamuwulira neende emyooyo kyaabwe kyoosi;

³ abataholaangaho esibi, nae abakeendera sa mu ngira ch'Omwaami.

⁴ Ewe Omwaami, watuberesa ebilagiro byao, watuboolera oti hubiliindeenge bulai.

⁵ Bulaanu mba ninyomiriire ohuliinda ebilagiiriro byao!

⁶ Bulaanu mba nindata omwooyo kwaange kwoosi, hu ebyo byoosi bi walagira, esoni haba sichahadiire daawe.

⁷ Njia ohuhufumiaanga neende omwooyo muluungifu, ninjekere eheenga y'emisaango yao yadyeeri.

⁸ Njia ohudiiraanga amalako kao, mani otaanjwaang'a daawe!

Ohwiisa oluyaali mu malako k'Omwaami

⁹ Omuraaga anyala atye ohuliinda obulamu bwae nibubulamo esyonoono? Anyala n'aloondakana neende emboosi yao.

¹⁰ Teemaho neende omwooyo kwaange kwoosi ohuhuhalaabanira; otaandeha ndajeemera amalako kao.

¹¹ Emboosi yao ndayiliinda mu mwooyo kwaange, haye ohwonoona mu moni wao.

¹² Ofumisibwe ewe Omwaami; onjekese manye ebilagiro byao.

¹³ Mani mba njia ohukaloondamo neende ekono hoongo amalako koosi ka watuberesa.

¹⁴ Sangaalira mu huloondakana neende amalako kao ohuhira ohunyoola emyaandu miingi.

¹⁵ Ndaha muno ohubasaanga hu bilagiiriro byao; ohwehaliirisaanga bi wundagira.

¹⁶ Sangaalira amalako kao; haba siinjia ohwiibirira amalako kao.

Ohusangaalira amalako k'Omwaami

¹⁷ Ngwiire esisa, ese omuhalaabani wao, mbe omulamu, mani nyale ohuliinda emboosi yao.

¹⁸ Yikula emoni chaange, nyale ohubona ebiwuukisa biri mu malako kao.

¹⁹ Hu syaalo huno ese ndi sa omubita-ngira sakira otaangisa amalako kao.

²⁰ Omwooyo kwaange kwekoomba muno ohumanya eheenga y'emisaango yao y'endaalo choosi.

²¹ Woolobya abo abehuduumbasa; abajeemera amalako kao obabwaaba.

²² Nduseho amanyeko kaabwe neende ohulekeeresa hwaabwe, olwohuba ese ndaliinda amalako kao.

²³ Abeemirisi bosi beehala mani nibaahoba, nae ese omuhalaabani wao njia ohubasaanga hu ebilagiiriro byao.

²⁴ Olwohuba sangaalira mu bilagiro; ebyo nibyo ebingerakira.

Ohuheengerao elalira ohuliinda amalako k'Omwaami

²⁵ Obulamu bwaange bwandiire mu lufu; ngobosemo obulamu, koti lu wasuubisa.

²⁶ Nindeeyolobya ebyonoono byoosi bi ndahola, wangobolamo; mani njekese ebilagiiriro byao.

²⁷ Ewe hoonye manye amalako kao, hu nyale ohubasaanga hu biindu byao biwukisa bi wahola.

²⁸ Esibeera sinjiita; ngobosemo amaani koti lu wasuubisa.

²⁹ Monie haye ohuloondakana neende ebidoondobanu; nae hulw'esisa syao, njekese amalako kao.

³⁰ Heengereo ohuba omweesikwa; ndeere omwooyo hu bilagiiriro byao.

³¹ Ewe Omwaami, ese noondakana neende ebilagiro byao; otaandeha ndadiirwa esoni.

³² Njia ohwooseresaanga by'olagira, n'omeeda ohumanya hwaange.

Esaala yisaba ohumanya

³³ Ewe Omwaami, njekese amahuluundu k'amalako kao, mani mba njia ohukadiiraanga buli siha.

³⁴ Mberese amakesi nindeenge amalako kao; haandi kadiireenge neende omwooyo kwaange kwoosi.

³⁵ Hoonye ohudiiraanga amalako kao, olwohuba mu malako ako nimwo mu sangaalira.

³⁶ Mberese obwekoombi bw'ohudiira amalako kao ohuhira ohuba neende eby'engaanga.

³⁷ Monie ohumalira omwooyo kwaange hu biindu bitaalimo obuhoonyi; nae emboosi chao chiimberese obulamu.

³⁸ Yomiisa bi wasuubisa omuhalaabani wao, bi wasuubisa abo abahwiisamo oluyaali.

³⁹ Monie amanyeko ka ndatya; olwohuba eheenga y'emisaango yao ndai niyo.

⁴⁰ Bona, ndekoomba ohudiira amalako kao; mu buluungifu bwao, mberese obulamu.

Ohweesika amalako k'Omwaami

⁴¹ Ewe Omwaami, leha obuheeri bwao butakaama bube naange, haandi wumonie koti lu wasuubisa.

⁴² Ao mani njia ohukobola mwaabo abaanyeka olwohuba ese ndeesika emboosi yao.

⁴³ Hoonye nyale ohulomalomaanga obwadyeeri buli siha, olwohuba suubira mu heenga y'emisaango yao.

⁴⁴ Njia ohudiiraanga amalako kao butoli-toli, endaalo choosi pe.

⁴⁵ Haandi njia ohubechaanga mu muleembe, olwohuba ndeema muno ohudiira ebilagiro byao.

⁴⁶ Njia ohulaangirira amalako kao eyiri abatuki haba siinjia hudiirwa esoni daawe.

⁴⁷ Saangaalira ohudiira amalako kao, olwohuba ndakaheera muno.

⁴⁸ Njisa oluyaali mu malako kao, haandi ndakaheera; njia ohubasaanga hu bilagiiriro byao.

Ohwoomiirira mu malako k'Omwaami

⁴⁹ Ewe Omwaami, yichulisa bi wasuubisa omuhalaabani wao; ebyo ebyandeetera esuubi.

⁵⁰ Kata ndahasaanda, njia ohusangaala, olwohuba si wasuubisa, syangobosamo amaani.

⁵¹ Abehuduumbasa baanyeka muno, nae haba sindalehanaho neende amalako kao.

⁵² Ninjichulisa hu heenga y'emisaango yao ehale, sangaala muno, ewe Omwaami.

⁵³ Niimbona abahola-mbi, nibahalaka amalako kao, etima lindiira muno.

⁵⁴ Mu bulamu bwaange obubita-bubita buno, nyemba enyembo chidiira hu bilagiro byao.

⁵⁵ Esiro hwiichulisa, ewe Omwaami, haandi mbaasa hu malako kao.

⁵⁶ Ohudiira amalako kao, hweholere esangaalo lyaange.

Ohumalira omwooyo hu malako k'Omwaami

⁵⁷ Ewe Omwaami, niiwe omukabo kwaange; suubisa ohudiiraanga amalako kao.

⁵⁸ Mani husaba nomwoyo kwaange kwoosi endi, ngwiire esisa, koti lu wasuubisa!

⁵⁹ Nindehaliirisa ebiima byaange, ngaluuhana mani ninoondehana neende ebilagiiriro byao.

⁶⁰ Nyanguya ataali ohweng'oonia ohudiira amalako kao.

⁶¹ Abahola-mbi nibaandeka omuteego, ese haba sinjibirira amalako kao.

⁶² Esiro akati simuha ohuhufumia, olwohuba amalako kao maluungifu niko.

⁶³ Ese ndi omwiicha waabo boosi abahwiisamo oluyaali, haandi owaabo boosi abadiira amalako kao.

⁶⁴ Omwaami, obuheeri bwao butaakama bweechula mu syaalo; njekese manye amalako kao.

Engaanga yiri mu hudiira amalako k'Omwaami

⁶⁵ Wosereese si wasuubisa, ewe Omwaami, mani wuuholereenge ebilai, ese omuhalaabani wao.

⁶⁶ Njekese eheenga y'emisaango yao ndai neende ohumanya, olwohuba ese ndeesika amalako kao.

⁶⁷ Nisisiiri ohusaanda, ndali nindanaliirira ohwonoona, nae bulaanu, ndiira emboosi yao.

⁶⁸ Oli omulai, ohola ebilai; njekese amalako kao.

⁶⁹ Abehuduumbasa banomanomaho eby'obubacha, nae ese nyomiirira hu makerako kao neende omwooyo kwaange kwoosi.

⁷⁰ Emyooyo kyaabwe chonooniswe, nae ese sangaalira ebilagiiriro byao

⁷¹ Ohusaanda hwaange hwahoonya muno, olwohuba hwakera ndeeka ebilagiro byao.

⁷² Amalako kao k'engaanga hoongo muno yi ndi ohuhira esaabbu neende efeesa elifu-ne-lifu.

Obwadyeeri bw'amalako k'Omwaami

⁷³ Ewe niiwe owanoonga, haandi niiwe owuniinda; mberese amakesi, hu njeke amalako kao.

⁷⁴ Abo boosi abahwiisamo oluyaali nibaanambonaanga, bachia ohusangaala, olwohuba ndeesika si wasuubisa.

⁷⁵ Manyire endi ewe Omwaami, oheenga emisaango mubwadyeeri; haandi wasaandya olwohuba oli omweesikwa.

⁷⁶ Leha obuheeri bwao butaakama buunemye omwooyo, koti lu wasuubisa, ese omuhalaabani wao.

⁷⁷ Ngwiire esisa, hu nyale ohubaao omulamu olwohuba sangaalira amalako kao.

⁷⁸ Abehuduumbasa bahoya badiirwa esoni, olwohuba bambachira buhaya; nae ese, njia ohubasaanga hu malako kao.

⁷⁹ Abo boosi abahwiisamo oluyaali beecha yi ndi hu bamanye bi walagira.

⁸⁰ Naange hoya ndoseresaanga bulai ebilagiro byao, mani huhaye ohudiirwaanga esoni.

Esaala y'ohununulwa

⁸¹ Ewe Omwaami, amaani kambwereere elalira, nihuliinda endi wiichie wuumonie; nae ese ndeesika si waboola.

⁸² Njoong'ere ohutingaala ni niinda ohubona si wasuubisa, nindeteeba endi, “Wahasangaase liina?”

⁸³ Mbulamo obuhoonyi bwoosi koti esideendekere syasukunwa hale; kata katyo, haba sindeebirira amalako kao.

⁸⁴ Ese omuhalaabani wao, ndahaliinde ohwoola liina? Abaanyiingania abo, wahabaheengere liina omusaango?

⁸⁵ Abehuduumbasa, abatadaha ohudiira amalako kao, bamalire ohunjabira obuko nibaateka ngweemo.

⁸⁶ Amalako kao koosi keesikiha; nae abaandu banyiingania ataali esifune, ewe hoonye!

⁸⁷ Bali aambi ohuusihirisa ndule hu syaalo; nae ese haba sindalehana neende ebilagiro byao.

⁸⁸ Nae ohweema hu buheeri bwao butaakama, wonia obulamu bwaange, hu syesi nyale ohudiiraanga amalako kao.

Ohwomiirira hu malako k'Omwaami

⁸⁹ Ewe Omwaami, emboosi yao yiyiindira endaalo choosi; kata neende Muukulu yiba enyomiifu.

⁹⁰ Obweesikwa bwao buyiindira endaalo choosi; ewe wamala ohwomiisa esyaalo, mani haba sisidengaana daawe.

⁹¹ Ebiindu byoosi bisisiiriwo koti lu walagira, olwohuba ebyo byoosi bihuhalaabanira.

⁹² Amalako kao kaba nikataali niko akasangaasa, ese mba ndamala ohufwa hale hulw'esaando yaange.

⁹³ Ese haba siinjia hwiibirira amalako kao, olwohuba ako niko ka wuumbereseeremo obulamu.

⁹⁴ Ese ndi owao mweene, mani ewe monie; olwohuba ndeemaho muno ohudiira amalako kao.

⁹⁵ Abahola-mbi bandelindiriire ohuusihirisa, nae ese njia ohubasaanga hu malako kao.

⁹⁶ Ese malire ohubona koti lu biindu byoosi biri neende enjakamo; nae amalako kao kabula enjakamo.

Ohudaha amalako k'Omwaami

⁹⁷ Ndaheera muno amalako kao, ngeekerakiraho oludaalo lwoosi.

⁹⁸ Amalako kao kali naange ebiha byoosi mani kaahola ohuba omukesi ohuhira abasuku baange.

⁹⁹ Ese manyire ebiingi ohuhira abeekesa baange boosi, olwohuba mbaasa muno hu bilagiiriro byao.

¹⁰⁰ Ndi omukesi muno ohuhira abakofu, olwohuba ndiira ebilagiro byao.

¹⁰¹ Ese ndebwaaba ebiima bibi byoosi, hu nyale ohudiiraanga by'oboola.

¹⁰² Ese haba sindalehanaho neende ebilagiiriro byao, olwohuba ewe niiwe owuunjekesa

¹⁰³ Ebilagiiriro byao binyunyuulira muno, binyunyuula ohuhiraho obuuhi bw'enjuhi.

¹⁰⁴ Bi weekesa bikera ndaaba omukesi, mani sakira ese ndasyuulana neende ebiima bibi.

Amalako k'Omwaami kahosa koti obulafu

¹⁰⁵ Emboosi yao niyo etaara lihosera yi njiira haandi nilyo obulafu bw'engira yaange.

¹⁰⁶ Ndeechubire neende esichubo haandi maliriire elalira, endi njia ohudiiraanga ebilagiiriro byao biluungifu.

¹⁰⁷ Esaando yaange muno; ewe Omwaami, oniinde ni ndi omulamu koti lu wasuubisa.

¹⁰⁸ Ewe Omwaami, siima ebiyaanwa byaange byohuhweebasa, haandi wuunjekese manye amalako kao.

¹⁰⁹ Obulamu bwaange buli mu bidinyu buli siha, nae ese haba sinjibiriraanga amalako kao.

¹¹⁰ Abahola-mbi baandeka omuteego, nae haba sindehanaangaho neende ebilagiro byao.

¹¹¹ Ebilagiiriro byao nikwo omukabo kwaange kw'endaalo choosi; nibyo esangaalo ly'omwooyo kwaange.

¹¹² Malire ohuheengao ohudiiraanga amalako kao ohwoola lu ndirifwa.

Amalako k'Omwaami niko akaniinda

¹¹³ Ndasyuula abaandu bateesikiha, nae ndaheera amalako kao.

¹¹⁴ Olwohuba niiwe obwiiruhiro bwaange, haandi niiwe engabo yaange; ndeesika bi wasuubisa.

¹¹⁵ Mumbweere-eyi, eng'we abahola-mbi, hu nyale ohudiira amalako ka Nasaae waange.

¹¹⁶ Mberese amaani koti lu wasuubisa, doong'e nisisiiri omulamu; otaandeha ndayaambwa esoni nihweesikire!

¹¹⁷ Mberese amaani mbe mu muleembe mani njia ohudiiraanga amalako kao endaalo choosi.

¹¹⁸ Ewe haba s'odeeba hu abo boosi abalehana neende ebilagiiriro byao; endekeha chaabwe ch'obubacha chibula obuhoonyi.

¹¹⁹ Abahola-mbi bohu syaalo boosi obayira koti ebikoha, mani sakira ese ndaheera ebilagiiriro byao.

¹²⁰ Hinakirira mu bulamu bwaange bwoosi olw'ohuhutya, haandi tya eheenga y'emisaango yao.

Ohuwulira amalako k'Omwaami

¹²¹ Holere ebyadyeeri haandi ebilai; otaanjwaang'a mu bunyala bw'abasuku baange!

¹²² Suubisa ohuhoonya omuhalaabani wao; otaleha abehuduumbasa ohufwiinyirira.

¹²³ Emoni chaange chijoong'ere ohutingaala niniinda ohumonia, neende ohununula hu wasuubisa, ewe omuluungifu.

¹²⁴ Holera omuhalaabani wao ohuchaanakana neende obuheeri bwao butaakama, haandi onjekese ebilagiro byao.

¹²⁵ Ndi omuhalaabani wao; mberese ohutegeera, hu nyale ohumanya amalako kao.

¹²⁶ Omwaami, sino nisyo esiha syoohoyere ohuholaho esiindu, olwohuba haba sibadiirire amalako kao.

¹²⁷ Ndaheera muno amalako kao ohuhira esaabbu, ohuhirira elalira esaabbu yihiramo obulai.

¹²⁸ Mani sakira noondakira ebyo byoosi by'olagira; haandi sakira sindahana neende eby'obubacha.

Ohwekoomba ohuwulira amalako k'Omwaami

¹²⁹ Amakerako kao kawukisa; sakira kadiira neende omwooyo kwaange kwoosi.

¹³⁰ Ohutotola enjekesa yao huleeta obulafu haandi huberesa amakesi abo abataali neende amakesi.

¹³¹ Nindekoomba amalako kao ese njeraana ninjasamiriire omunwa.

¹³² Ngaluuhanire mani wuungwiire esisa koti lw'oholeraanga abo boosi abahuheera.

¹³³ Niindeenge koti lu wasuubisa, haandi otaleha esyonoono syaatuka.

¹³⁴ Ewe nunule onduse hu abo abali ohusaandya, hu nyale ohudiira ebilagiro byao.

¹³⁵ Tingaala neende esisa eyiri omuhalaabani wao, haandi wuunjekese amalako kao.

¹³⁶ Amasika kaange kahulukusa koti omwaalo, olwohuba abaandu bahayire ohudiira amalako kao.

Amalako k'Omwaami kadyeeri

¹³⁷ Ewe Omwaami, niiwe omuluungifu, haandi amalako kao kadyeeri niko.

¹³⁸ Ebilagiro wabiberesa mu biluungifu haandi mubwadyeeri bweene.

¹³⁹ Etima linjiita-bwiita, olwohuba abasuku baange beebiriire emboosi chao.

¹⁴⁰ Si wasuubisa syomiifu nisyo, sakira ndasiheera.

¹⁴¹ Ese ndi nambula-buchiiro haandi ndekeeresebwa, nae haba sinjibiriraanga ebilagiro byao.

¹⁴² Obuluungifu bwao bw'endaalo choosi, haandi amalako kao kadyeeri.

¹⁴³ Ebidinyu neende amasira binjichuuleho, nae amalako kao niko esangaalo lyaange.

¹⁴⁴ Ebilagiiriro byao biluungifu endaalo choosi; mani mberese amakesi nyale ohubaao omulamu.

Esaala y'ohusaba ohununulwa

¹⁴⁵ Ewe Omwaami, husaba neende omwooyo kwaange kwoosi; ngobolemo, njia ohudiira amalako kao!

¹⁴⁶ Hwekongooya wuumonie; nyale ohudiira amalako kao.

¹⁴⁷ Echuli mu mabwiibwi ebukwe niyisisiiri ohuheba, husaba wuuhoonye. Ndeesika si wasuubisa.

¹⁴⁸ Esiro syoosi ngona ni moka, nimbaasa hu bi walagira.

¹⁴⁹ Olw'obuheeri bwao butaakama, ewe Omwaami, owulire si mboola; endi oliinde obulamu bwaange, ewe owadyeeri.

¹⁵⁰ Abangiiya b'egiili mbano basudire aambi neende esichiiririrwa syaabwe sibi; nibo abaandu bataloondakana neende amalako kao.

¹⁵¹ Nae ewe Omwaami, oli aambi muno naange, haandi amalako kao koosi kadyeeri.

¹⁵² Ohutula hale-na-haandi, ndeeka ebilagiro byao mani nimanya endi wabitaao bibeeo endaalo choosi.

Ohwekongooya ohuhoonywa

¹⁵³ Bona amasira kaange, mani wuununule, olwohuba haba sinjibirira amalako kao.

¹⁵⁴ Ngayirire mani wuunjabine; mberese obulamu koti lu wasuubisa.

¹⁵⁵ Abahola-mbi haba sibachia huwonisibwa daawe, olwohuba haba sibadeeba hu malako kao.

¹⁵⁶ Esisa syao siingi muno, ewe Omwaami; mberese obulamu, ewe owadyeeri.

¹⁵⁷ Abaanyiingania neende abataandaha baangi muno, nae haba sindehaangaho ohudiira amalako kao.

¹⁵⁸ Mbona abahobi abo neende okusinye, olwohuba haba sibadiira amalako kao.

¹⁵⁹ Ewe Omwaami, bona koti lu ndaha by'olagira. Olw'obuheeri bwao butaakama, liinda obulamu bwaange.

¹⁶⁰ Omulamwa kw'amalako kao, kwadyeeri nikwo, haandi eheenga y'emisaango yao nuungifu y'endaalo choosi pe.

Ohweyaanayo eyiri amalako k'Omwaami

¹⁶¹ Abaandu ab'amaani bali ohuunyiingania ataali esifune, nae ese njisa oluyaali mu malako kao.

¹⁶² Sangaalira bi wasuubisa, koti lu ndasangaalira ebinyakirwe biingi muno.

¹⁶³ Ese sindaha haandi ndasyuulana eby'obubacha, nae ndaheera amalako kao.

¹⁶⁴ Buli ludaalo ese hukinia amahabi kataanu-na-kabiri, hulw'eheenga y'emisaango yao nuungifu.

¹⁶⁵ Abo boosi abaheera amalako kao bali neende omuleembe muungi, sibulao esiindu syosi-syoosi esinyala syaabatekera baakwa.

¹⁶⁶ Ewe Omwaami, huliindiriire wiichie wuumonie, haandi holaanga ebyo byoosi bi walagira.

¹⁶⁷ Ndiira ebilagiro byao, haandi ndabiheera muno.

¹⁶⁸ Ndiira amalako kao neende ebilagiiriro byao, haandi obona buli siindu si hola.

Esaala y'ohusaba obuhoonyi

¹⁶⁹ Ewe Omwaami, leha amaliro kaange koole yooli; wuumbere ohumanya koti lu wasuubisa.

¹⁷⁰ Wulire ohusaba hwaange, mani wuumonie koti lu wasuubisa.

¹⁷¹ Njia ohuhufumiaanga buli ludaalo, olwohuba wuunjekesa amalako kao.

¹⁷² Njia ohweembaanga bi walagira, olwohuba amalako kao kadyeeri.

¹⁷³ Buli ludaalo ba omwetekefu ohuhoonya, olwohuba ese ndaheengao ohudiiraanga ebilagiro byao.

¹⁷⁴ Ewe Omwaami, ese ndekoomba wuumonie, haandi amalako kao niko akasangaasa.

¹⁷⁵ Mberese obulamu, njia ohuhufumiaanga; haandi leha ebilagiiriro byao bihoonye.

¹⁷⁶ Nda kotaana koti amakoondi lyakota, koonya omuhalaabani wao, olwohuba haba sinjibiraanga amalako kao daawe.