Esabbuli 118 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohweebasa olw'ohuyiingira

¹ Mweebase Omwaami, olwohuba mulai niye, obuheeri bwae bw'endaalo choosi pe.

² Lehe abaandu ba Yisiraeli baboole bati, “Obuheeri bwae bw'endaalo choosi pe.”

³ Lehe ab'enyuumba ya Arooni baboole bati, “Obuheeri bwae bw'endaalo choosi pe.”

⁴ Lehe abo abeesa oluyaali mu Omwaami baboole bati, “Obuheeri bwae bw'endaalo choosi pe.”

⁵ Nindali mu bidinyu, ndekongooya Omwaami; yangobolamo mani n'amonia.

⁶ Omwaami ali naange, haba siinjia hutya daawe. Omuundu anyala ohuuholaho siina syeene?

⁷ Omwaami ali hu lwaande lwaange ohuhoonya, sakira ndahayiingire abasuku baange bataandaha.

⁸ Silai ohweesika Omwaami ohuhira ohweesika abaandu.

⁹ Silai ohweesika Omwaami ohuhira ohweesika abatuki.

¹⁰ Abasuku baangi baandebodoohania; nae olw'obunyala bw'Omwaami, ndabasihirisa.

¹¹ Bandebodoohanie, bandebodoohanie hu embeka choosi; nae olw'obunyala bw'Omwaami, ndabasihirisa.

¹² Bandebuunihaho koti enjuhi, babbabbuluha koti omuliro kwomu mawa; nae olw'obunyala bw'Omwaami ndabasihirisa.

¹³ Baseeta neende amaani maangi, mani niimba aambi bweene ohuyiingirwa, nae Omwaami mani n'ahoonya.

¹⁴ Omwaami niye amaani kaange haandi niye olweembo lwaange; yeholere omuwonia waange.

¹⁵ Tekeerese engalaakasa ch'ohwehoya ohuyiingira echiri mu mayeema k'abaandu baluungifu: “Amaani k'Omwaami niko akaholere katyo!

¹⁶ Amaani kae niko akakerere hwaayiingira amaani kae maangi mu biita!”

¹⁷ Ese haba siinjia hufwa: Njia ohubaao omulamu mani njaale ebiindu bi Omwaami yahola.

¹⁸ Nasaae yasaandiisye muno, nae haba sayaandehere ndaafwa.

¹⁹ Munjikulireo ebiruwa by'Enyuumba ya Nasaae; nyingire mani ndeebase Omwaami!

²⁰ Sino nisyo esiruwa sy'Omwaami; abaluungifu boong'ene nibo anyala ohwiingiriramo.

²¹ Ese hweebasa ewe Omwaami, olwohuba waambulira, haandi weeholere obuwonia bwaange.

²² Ekina li boombahi libahaya koti elibula obuhoonyi lyeeholere ohuba elihiramo obuhoonyi muno.

²³ Sino Omwaami niye owasihola, hwasibona, mani nisiwukisa?

²⁴ Luno nilwo oludaalo lu Omwaami yataao; lehe husangaale, haandi lehe hulwehoyeremo!

²⁵ Ewe Omwaami, huhwekongooya, tuwonie! Ewe Omwaami, huhwekongooya, leha bi huhola obiberese ehabi!

²⁶ W'ehabi oyo owiichia mu liita ly'Omwaami! Hubasabira ehabi nihuli mu nyuumba y'Omwaami.

²⁷ Omwaami niye Nasaae otuberesa obulafu. Mudiire ehiindu mu mahono keeng'we mani muhuumbe nimweebodoohania alutaari.

²⁸ Niiwe Nasaae waange, njia ohuhweebasaanga; niiwe Nasaae waange, njia ohuhukinia.

²⁹ Mani mweebase Omwaami, olwohuba mulai niye, haandi obuheeri bwae bw'endaalo choosi pe.