Esabbuli 115 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae ali mulala yeeng'ene

¹ Ewe Omwaami, oluyaali lwao haba silutuhoyera, nae beresa eliita lyao oluyaali, olwohuba obuheeri bwao butaakama neende obweesikwa bwao.

² Lwasiina abaandu b'ebyaalo biindi batuteeba bati, “Nasaae weeng'we ali yeena?”

³ Nasaae weefwe ali Muukulu; ahola buli siindu sy'adaha.

⁴ Nae ebiloongaloongwe byaabwe byetaanyisibwa mu feesa neende mu saabbu, byetaanyisibwa neende amahono k'abaandu.

⁵ Biri neende eminwa, nae haba sibinyala ohulomaloma, biri neende emoni, nae haba sibinyala ohubona.

⁶ Biri neende amatwi, nae haba sibinyala ohuwulira, biri neende amoolu, nae haba sibinyala ohuwunyiirisa.

⁷ Biri neende amahono, nae haba sibinyala ohudiira, biri neende amakulu, nae haba sibinyala ohukeenda; kata sibinyala ohutusa ekono mu mimiro kabyo.

⁸ Abo boosi ababitaanya bahafwaane nabyo, neende abo boosi ababyeesika.

⁹ Eng'we abaandu ba Yisiraeli, mweesike Omwaami. Olwohuba oyo niye engabo yeeng'we haandi niye obuhoonyi bweeng'we.

¹⁰ Eng'we ab'enyuumba ya Arooni, mweesike Omwaami! Oyo niye engabo yeeng'we, haandi niye obuhoonyi bweeng'we.

¹¹ Eng'we mweesi abeesa oluyaali mu Omwaami, mweesike Omwaami. Olwohuba oyo niye engabo yeeng'we, haandi niye obuhoonyi bweeng'we.

¹² Omwaami atwiichuliise; achia ohutuberesa ehabi; achia ohuberesa abaandu ba Yisiraeli ehabi achia ohuberesa ehabi ab'enyuumba ya Arooni.

¹³ Omwaami achia ohuberesa ehabi abo abamwiisamo oluyaali, abayere neende abahuluundu.

¹⁴ Leha Omwaami ababerese olwiibulo luungi eng'we alala neende abeechuhulu beeng'we!

¹⁵ Leha Omwaami ababereseenge ehabi, oyo owaloonga ekulu neende esyaalo!

¹⁶ Ekulu elyo ly'Omwaami nilyo, nae esyaalo yasiberesa abaandu.

¹⁷ Abafu haba sibanyala hukinia Omwaami daawe, kata abo abeeha emakoombe.

¹⁸ Nae efwe abalamu huchia ohufumia Omwaami ohutula buti ohwoola endaalo choosi pe. Fumie Omwaami!