Esabbuli 112 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esangaalo ly'omuundu mulai

¹ Fumie Omwaami! Ali neende ehabi oyo owiisa oluyaali mu Omwaami, osangaalira muno ohudiira ebilagiro byae.

² Abaana bae bahabecheenge ab'amaani hu syaalo. Abeechuhulu bae bahabecheenge ab'ehabi.

³ Edaala lyae lichia ohuyiindiyala libe neende emyaandu, haandi achia ohuba omunyali endaalo choosi.

⁴ Obulafu bwaaduhira mu siirima eyiri omuluungifu, Omwaami w'esisa, aleheramo haandi muluungifu niye.

⁵ Ali neende ehabi omuundu mukabi haandi omweyosi, oyo omweesikwa mu buli siindu sy'ahola.

⁶ Omuundu muluungifu achia ohwomiira buli siha; achia ohwiichuliswa endaalo choosi.

⁷ Omuundu oyo haba siyelalihirira n'anyoola emboosi mbi; mwomiifu olwohuba yeesika Omwaami.

⁸ Haba saatya daawe, omwooyo kwae mwomiifu, ohwoola lu yahabone abasuku bae nibayingiirwe.

⁹ Akabira abo abali mu ngisa, haandi esisa syae haba sisihendeera daawe; mani yahasiimwe haandi yeeswemo oluyaali.

¹⁰ Esyo omuhola-mbi asibona mani nisimudiisa etima; asiingira okusinye mani n'ahamyuuhao; ohwekoomba hw'omuhola - mbi hubuliramo elalira obuhoonyi.