Esabbuli 109 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwekanyiirisa hw'omuundu oli mu bidinyu

¹ Ewe Nasaae niiwe yi fumia; otabuleera-buwuleera!

² Abahola-mbi neende ababacha baaseeta, bemeeda ohunomanomaho eby'obubacha.

³ Bamboolera emboosi ch'egiili choong'ene, baaseetera bihaya byeene.

⁴ Kata audahaba mbwe ndabaheera, baanjalana-buwalana, ese naange mbasabira-busabira.

⁵ Ese mbaholera ebiindu bilai byoong'ene, nabo baatuunga neende ebibi, ese ndabaheera, nabo baasyuula.

⁶ Mudoole omukayi omuliichaki ohuheengera omusuku waange omusaango, mani leha mulala hu basuku bae bamuwabire omusaango.

⁷ Mani nibamuheengera omusaango, leha kumuhire; kata bi yewosaho byosi bihoya byaabalwa koti esibi.

⁸ Esiha sy'obulamu bwae sihendeere; omuundu wuundi ayire omulimo kubeere okwae.

⁹ Abaana bae babe bamulehwa, omuhasi wae yeehole omuhasi mufwiirwe

¹⁰ Abaana bae babe abasabirisi nambula-madaala; beerusweenge ohutula mu makuunda ka bamenyamo!

¹¹ Amubaanja ayaaye ebiindu byae byoosi, haandi abateende bayaaye ebyo boosi bi biyadidihanira.

¹² Ahoya yaawulao omuundu yeesi omukwiira esisa noomba oliinda abaana bae b'alehere koti bamulehwa.

¹³ Olwiibulo lwae lwoosi lufwe lusihirire, yibuleo olwiichulisa mu ndaalo chiichayo.

¹⁴ Omwaami yesi yeechulise ebyonoono bya bakuukaang'ene haandi esyonoono sya ng'ina sihaye ohuleherwamo.

¹⁵ Omwaami yechuliseenge ebyonoono byaabwe endaalo choosi, nae abeene bebiririirwe elalira!

¹⁶ Olwohuba omuundu oyo haba siyabaamo omwooyo kusaasira; yakiiyanga abamanani neende abali mu budahano, neende banaambula-buchiiro, n'adaha ohubeeta.

¹⁷ Yali yaheera muno ohubwaaba, mani omweene ahoya yaabwaabwa! Yali s'adahisa abaasye ehabi, mani leha ehabi chimutuleho.

¹⁸ Yali yalumirira ohubwaaba koti lu yahalumirira ohwefwaala engubo; mani ebibwaabo byae ebyo bihoya byaahamira mu mubiri kwae koti amaachi kahamira mu loba haandi bihoya byaabita mu makuumba koti amafuta k'enaasi kaholaanga!

¹⁹ Ebibwaabo byae bimufuunihe hu mubiri kwoosi koti engubo haandi abyeeboye buli ludaalo koti olusibiro.

²⁰ Leha kuno kube omukabo kw'abasuku baange, abo abalomaloma bubi hu bulamu bwaange.

²¹ Nae ewe, Nasaae Omwaami waange, hoonye koti lu wasuubisa; njabine, olwohuba obuheeri bwao butaakama bulai nibwo.

²² Olwohuba ndi omumanani haandi ndi mu ngisa, njuunirwe ohwoola hu ndasi.

²³ Nifwaana koti esiiniha sy'engoloobe, ndi aambi ohuhamyuuhao; nduumulirwe eyale koti esikooko.

²⁴ Amahuumbo kaange kahinaakiriha olw'ohusiiba enjala; ng'ayire muno, ndoong'iise amakuumba mahaya.

²⁵ Abaandu nibambonaho, baanjeha-bucheha; bayuuya emitwe nibabbiisa.

²⁶ Ewe Omwaami, Nasaae waange, hoonye; monie olw'obuheeri bwao butaakama!

²⁷ Leha abasuku baange bamanye bati ewe niiwe owumoniisye.

²⁸ Leha beedinye sa ohuumbwaaba, nae ewe mberese sa ehabi. Diisa esoni abo abaasaandya, nae leha ese omuhalaabani wao sangaale.

²⁹ Leha abasuku baange befwaale esoni, leha beboyokanie mu soni chaabwe koti mu ngubo.

³⁰ Njia ohweebasa Omwaami lukali muno; njia ohumufumia mu lwiichuule lw'abaandu.

³¹ Olwohuba alwaaniriraanga abali mu budahano, ohubawonia abo ababaheengera omusaango kw'ohufwa.