Esabbuli 107 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

ESITABO SYOHUTAANU Sab 107—150 Ohufumia obulai bwa Nasaae

¹ “Mweebase Omwaami, olwohuba mulai niye; obuheeri bwae bw'endaalo choosi.”

² Lehe abo boosi ba Omwaami yanunula baboole batyo, abo boosi bayawonia ohutula mu bunyala bw'abasuku.

³ Yababuusa alala mani n'abatusa mu byaalo biingi, ohubatusa ebukwe neende emuumbo, ohutula emukulu neende emwaalo.

⁴ Abaandi bali nibayiikaana mu siparara sibulamo engira nibatamanyire bati bachia ohwoola mu siko si banaamenyemo.

⁵ Balumwa enjala neende obuluwo, mani nibawaamo esuubi lyoosi.

⁶ Mani nibalirira Omwaami mu bidinyu byaabwe, Omwaami n'abawonia mu masira kaabwe.

⁷ Yeecha yabeemirira hu ngira ngololofu ohwoola lu boola mu siko si bali nibachia ohumenyamo.

⁸ Lehe beebase Omwaami, olwohuba obuheeri bwae bw'endaalo choosi, neende ebiindu biwukisa bi yaholera abaandu.

⁹ Abalumwa obuluwo, Nasaae abanyisa emyooyo, abalumwa enjala, abeekusa neende ebiindu bilai.

¹⁰ Abaandu baandi bali mu siirima neende mu hweeyendeherera, nibali mu bidinyu haandi nibaboyerwe eminyororo,

¹¹ olwohuba bajeemera amalako ka Nasaae w'Obunyala, haandi balekeeresa engeraka yo Oyo oli Aakulu Muno.

¹² Bajoong'a hulw'emirimo ky'amaani muno, nibakwa aasi, haandi naabulao omuundu yeesi obahoonya daawe.

¹³ Mani nibalirira Omwaami nibali mu bidinyu byaabwe, Omwaami n'abawonia mu masira kaabwe.

¹⁴ Nasaae yabatusa mu siirima neende mu hweeyendeherera, mani n'ahalaka-halaka eminyororo chaabwe.

¹⁵ Bulaanu lehe beebase Omwaami, hulw'obuheeri bwae, neende hulw'ebiindu biwukisa byaaholera abaandu.

¹⁶ Alikula ebiruwa by'omugasa haandi yahalaka-halaka emitaliimbo ch'ebichuma.

¹⁷ Abaandi bali abasiru, mani baasaanda hulw'ebyonoono byaabwe neende hulw'ebibi byaabwe;

¹⁸ baheeherwe esyohulya syoosi mani baaba aambi ohufwa.

¹⁹ Mani nibalirira Omwaami mu bidinyu byaabwe, Omwaami n'abawonia mu masira kaabwe.

²⁰ Nasaae yatuma emboosi yae, mani n'abawonia, haandi n'abanunula ohubatusa mu husihirira.

²¹ Lehe beebase Omwaami, olwohuba obuheeri bwae, haandi olwohuba ebiindu biwukisa bi aholera abaandu.

²² Mani lehe bayaane ebiyaanwa byohu mweebasa, haandi beemba enyembo ch'esangaalo nibakinia ebiindu bi Nasaae yabaholera.

²³ Abaandu baandi basyaabalira mu meeri hu nyaanja, mani nibaholera emirimo kyaabwe hu maachi.

²⁴ Babona ebiindu bi Omwaami anyala ohuhola, ebiindu biwukisa bi aholera mu busiba.

²⁵ Yalagira omuyaka kw'amaani mani nikuwuucha nikusiingisa efwiinda chohu nyaanja.

²⁶ Emeeri chakeendera aakulu mu mboo, haandi cheeha aasi mu busiba; mani nibeebira aasi mu busiba. Mu masira kafwaana katyo, abeerusi b'emeeri beecha bawaamo omwooyo;

²⁷ baachaaka ohudokaana koti abameesi obumanyirifu bwaabwe bwoosi bwaabula sibuhoonya.

²⁸ Mani nibalirira Omwaami mu bidinyu byaabwe, Omwaami n'abawonia mu masira kaabwe.

²⁹ Omwaami yakamya omuyaka kwali nikuwuucha, mani efwiinda nichiyenjeera.

³⁰ Abaandu abo basangaala olw'obuyenjeefu obwo, mani n'abakoba buli hu sikobero si bali nibadaha.

³¹ Mani lehe beebase Omwaami hulw'obuheeri bwae, haandi neende hulw'ebiindu biwukisa bi yaholera abaandu.

³² Lehe bamufumie mu lwiichuule lw'abaandu haandi bamufumie muluhung'aano lw'abeemeresi.

³³ Omwaami yahola emyaalo kyomererera elalira haandi yaakamya esulo ohusooha.

³⁴ Nasaae yahola eloba lai lyeehola ely'omuunyu hulw'ebyonoono by'abaandu bamenyamo.

³⁵ Nasaae yakaluuhania esiparara syaaba ediba ly'amaachi haandi eloba lyooma lyasoohamo esulo.

³⁶ Omwo nimwo mu yaata abaandu balumwa enjala, mani niboombahamo esiko si banaamenyemo.

³⁷ Bayaanya emwo mu mikuunda, mani nibataakamo emisabbiibbu, banyoola ekesa lai muno.

³⁸ Omwaami yaberesa abaandu bae ehabi, mani nibeebula abaana abaangi; haandi siyafukiirira ebyaayo byaabwe byaduuduya obuungi.

³⁹ Abaandu ba Nasaae nibayiingirwa mani baaloongoyaswa olw'ohufwiinyirirwa, hulw'ebidinyu neende hulw'engisa,

⁴⁰ Nasaae yasinyihira abaandu babafwiinyirira mani yaakera abafwiinyiriri abo nibayiikaana mu siparara sibulamo engira.

⁴¹ Nae n'anunula abamanani n'abatusa mu ngisa yaabwe mani n'ahola amadaala kaabwe keengiya koti amakoondi.

⁴² Abaluungifu basibona mani nibeehoya, nae abahola-mbini bakwa eng'aang'a.

⁴³ Omuundu mukesi yeesi, leha ate omwooyo hu biindu bino; lehe abaandu babaaseenge hu buheeri bw'Omwaami.