Esabbuli 106 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obulai bw'Omwaami eyiri abaandu bae

¹ Fumie Omwaami! Mweebase Omwaami, olwohuba mulai; obuheeri bwae bw'endaalo choosi pe.

² Wiina onyala ohubala ebiindu bihunuufu bi yahola? Wiina mweene onyala ohumufumia yamalayo?

³ Bali neende ehabi abadiira ebilagiro byae, abo abahola ebiluungifu buli ludaalo.

⁴ Njichuliise, ewe Omwaami, n'odiirira abaandu bao esisa. Hoonye n'obanunula.

⁵ Leha mbone abaandu bao ba wadoola koti lu bayiindiyala, haandi nyooleho esangaalo ly'abaandu bao, syesi nyooleho oluyaali lw'ohubalirwa mu baandu bao.

⁶ Hwonoona koti bakuuka yeefwe bonoona; hwahola ebyonoono bitahoyera.

⁷ Bakuuka yeefwe bahaya ohumanya ebiindu biwukisa bi Nasaae yahola mu Misiri; beebirira obuheeri bwae buungi, mani nibajeemera ow'Obunyala bwoosi nibali hu Nyaanja Njahanyu.

⁸ Nae Nasaae yabawonia, koti lu yali niyasuubisa, hu baandu banyale ohubona obuhunuufu bw'amaani kae.

⁹ Yalagira Enyaanja Enjahanyu, mani niyihama niyoomerera; yeemirira abaandu bae bahalakania koti ababita mu siparara.

¹⁰ Yabawonia ababasyuula; mani n'abatusa mu bunyala bw'abasuku baabwe.

¹¹ Abasuku baabwe beetwa neende amaachi, mani yaabulao kata mulala owadoong'ao.

¹² Ao mani abaandu bae nibafukiirira emboosi chae; mani nibeemba enyembo chimufumia.

¹³ Nae beebirira bwaangu ebiindu bi Nasaae yali niyabaholera mani nibachaaka ohuhola ebiindu nibatamweteebereho mberi.

¹⁴ Nae beechula obwekoombi nibali mu siparara mani bateemera eyo Nasaae;

¹⁵ Mani Nasaae n'ababeresa bi bali nibasabire, nae haandi n'abaleetamo endwaae mbi muno.

¹⁶ Nibali nibamenyere mu kaambi, badiirira Musa embaliha neende Arooni, omuhalaabani mwoolerefu w'Omwaami.

¹⁷ Eloba lyaasama mani nilimira Datani mani nilisiiha Abbiramu neende abomu daala lyae boosi.

¹⁸ Omuliro kwosi nikwiiha hu bomu daala lyae; nikusaamba abahola-mbi abo.

¹⁹ Basaangulusa esaabbu mu Sinai, nibaholamo esifwaanani sy'esurusi njere mani nibasiinamira.

²⁰ Oluyaali lu bahabereese Nasaae, mani nibaluberesa esifwaanani sy'eng'oombe yirya obunyaasi.

²¹ Beebirira Nasaae wabawonia neende ebiholwa bihunuufu bi yahola mu Misiri,

²² ebiindu biwukisa bi yahola mu syaalo sya Haamu, ebiindu bitiisa bi yahola nibali hu Nyaanja Njahanyu!

²³ Nasaae yali n'aboola ati achia ohusihirisa abaandu bae, nae Musa omudoole mweene, yeema mu moni wa Nasaae, ohuyenjeesa etima alehe ohubasihirisa.

²⁴ Ao mani nibalekeeresa esyaalo silai muno, olwohuba esiindu si yasuubisa haba sibasifukiirira daawe.

²⁵ Bekanyiirisira mu mayeema kaabwe mani nibahaya ohuwulira bi Omwaami yali n'aboola.

²⁶ Sakira Nasaae yabalabula niyeechuba ati, achia ohubeetera mu siparara,

²⁷ abeechuhulu baabwe basalaanire mu byaalo bafwiire eyomu byaalo biteende mu bakotera.

²⁸ Niboola Peyori, bachaaka ohwiinamira Bbaali haandi nibachaaka ohulya ebiyaanwa byayaanirwa abafu.

²⁹ Banyoolesa Omwaami hulw'ebiholwa byaabwe bibi, mani oluumbe lubi muno nilubakwaamo.

³⁰ Finehaasi yasiingira mani n'asaandya abali nibonoonere, mani oluumbe lubi olwo nilwaakama.

³¹ Esiholwa sino nisimuhola ohuba omuluungifu onechulisebweenge endaalo choosi pe.

³² Haandi banyoolesa Omwaami nibali hu sulo cha Meribba mani nibaleetera Musa ebidinyu.

³³ Bamudiisa engisa nyiingi muno n'alomaloma n'atabaasiro mberi.

³⁴ Haba sibasihirisa abaandu bomu byaalo biteende, koti lu Omwaami yali n'abalagiire ohuhola.

³⁵ Nae besaasaania nabo mani nibeeka ebiima byaabwe.

³⁶ Abaandu ba Nasaae bachaaka ohwiinamira ebiloongaloongwe byaabwe, mani sino nisibaleetera ohusihirira.

³⁷ Bayaanayo abaana baabwe beene, abasyaani neende abahaana, koti ebiyaanwa eyiri emisaambwa mibi.

³⁸ Beetaanga abaana baabwe abataaliho omusaango, mani nibabayaanayo eyiri ebiloongaloongwe bya Kanani. Esyaalo nisyonoonebwa neende abatemo abo.

³⁹ Mu ngeri yityo, mani nibeehola ab'omusiro hulw'ebiholwa byaabwe ebyo, haandi nibatula hu Nasaae waabwe.

⁴⁰ Omwaami sakira yanyoolerera muno abaandu bae; mani n'abasinyihira elalira.

⁴¹ Nasaae mani n'abajwaang'a, n'abaleha mu bunyala bw'abaandu baandi, abasuku baabwe nibabatuka.

⁴² Abasuku baabwe babafwiinyirira muno nibabatukira elalira.

⁴³ Nae amahabi maangi, Omwaami yanunula abaandu bae, nae nibaheengao ohumujeemera, mani nibemeeda ohwiibira mu byonoono.

⁴⁴ Kata katyo, Omwaami niyawuliraanga nibamulirira, yabachuunirwaanga muno mu bidinyu byaabwe.

⁴⁵ Olw'obulai bwae, Nasaae yechulisaanga endagaano yae, haandi olw'obuheeri bwae buungi, etima lyae lyayeenjeraanga.

⁴⁶ Nasaae yakeraanga abo abasandyaanga abaandu bae, nibabakwiira esisa.

⁴⁷ Ewe Omwaami Nasaae weefwe, tuwonie mani otubuuse alala otutuse mu byaalo biteende, hu hunyale ohuhweebasaanga haandi hufumie eliita lyao lyoolerefu.

⁴⁸ Omwaami afumisibwe, Nasaae wa Yisiraeli; bulaanu haandi neende endaalo choosi! Haandi lehe buli baandu boosi babooleenge bati, “Amiina!” Fumie Omwaami!