Esabbuli 105 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae neende abaandu bae

¹ Mweebase Omwaami, laangirire obuhunuufu bwae; boolere ebyaalo biindi ebiindu bi yahola.

² Mweembe nimufumia Omwaami; lomalome hu biindu biwukisa bi yahola.

³ Mweehoye koti lu huli abaandu bae; lehe abaandu boosi abamwiinamira basangaale.

⁴ Chiicheenge eyiri Omwaami nimudaha obuhoonyi; mumwiinamireenge butoli-toli.

⁵ Yichuliseenge ebiholwa biwukisa bi yahola, eby'amayia byae, neende engeri yi yaheengeramo emisaango.

⁶ Eng'we abeechuhulu ba Abburahamu owali omuhalaabani wae, eng'we abaana ba Yakobbo, ba Nasaae yeedoolera!

⁷ Omwaami niye Nasaae weefwe; amalako kae niko akatuka esyaalo syoosi.

⁸ Achia ohwomiisa endagaano yae neende abaandu bae endaalo choosi, neende ebisuubise bi yabasuubisa ohumala enjibulo elifu ndala.

⁹ Achia ohwooseresa endagaano yi yahola neende Abburahamu, neende ebisuubise bi yasuubisa Yisaka.

¹⁰ Omwaami yahola endagaano neende Yakobbo, eyichia ohuyiindira ohumala endaalo choosi.

¹¹ Omwaami yaboola ati, “Njia ohuhuberesa esyaalo sya Kanani.” Ati, “Sichia ohuba esyao neende abeechuhulu bao.”

¹² Endaalo echo, abaandu ba Nasaae bali abadiidi muno, bali sa abayikaani mu syaalo sya Kanani.

¹³ Bayiikaanaanga nibatula mu syaalo silala nibachia mu siindi, haandi nibatula mu bwaami bulala nibachia mu buundi.

¹⁴ Kata katyo, Nasaae haba siyakanya omuundu yeesi ohubasaandya; ohutusaho yalagiraanga abatuki babalwaanirire:

¹⁵ N'aboola ati, “Mutachuuniaho abahalaabani ba ndadoola; abanabbi baange, mutabaholaangaho esibi syoosi daawe.”

¹⁶ Omwaami niyaleeta enjala hu syaalo syaabwe sya Kanani: Yabamalaho ebyohulya byoosi.

¹⁷ Nae Omwaami hwaanyale ohuwonia abaandu bae, yatuma omuundu ohubataangirira ohwoola mu Misiri; omuundu oyo niye Yosefu, owali yakusibwayo hale koti omuhalaabani muwaambe.

¹⁸ Amakulu kae kaboyebwa mu minyororo, haandi bamuboya mu kosi epiingo y'esichuma,

¹⁹ ohwoola ebiindu bi yali n'aboolere byoole ohweholeha. Emboosi y'Omwaami yomiise yiti yali owadyeeri.

²⁰ Omutuki w'e Misiri yatuma mani nibamuboolola; omutuki w'abaandu oyo yamulehuula.

²¹ Omutuki oyo yamuhola omwaami w'enyuumba yae haandi yamuhola yaaba omweemeresi w'esyaalo esyo syoosi,

²² yaaba neende obunyala ohutuka abahoongo b'omutuki haandi yaaba neende amaani katuka abakeraki bae.

²³ Mani Yakobbo yaacha mu Misiri mani n'amenyayo.

²⁴ Omwaami yaberesa abaandu bae abaana baangi haandi yaababeresa amaani akahira ak'abasuku baabwe.

²⁵ Yahola Abamisiri basyuula abaandu bae mani yaabachirisa abaandu bae.

²⁶ Omwaami haandi yatuma Musa omuhalaabani wae, neende Arooni yi yadoola.

²⁷ Bahola ebiindu bihunuufu bya Nasaae haandi bahola eby'amayia mu Misiri.

²⁸ Nasaae yaleeta esiirima hu syaalo, kata katyo, Abamisiri haba sibawulira amalako kae.

²⁹ Yoola yaakaluuhania emyaalo kyaabwe kyoosi kyaaba amabaanga mani niyeeta eng'eeni chaabwe choosi.

³⁰ Esyaalo syaabwe syeechulamo eneenga, kata neende edooho lyosi lyeechula eneenga.

³¹ Nasaae haandi yalagira, mani esiiye neende ebikiingi nibifuuniha esyaalo syoosi.

³² Yatuma amakina k'efula alala neende eemesu hu loba lyaabwe mu siha sy'efula ohukwa;

³³ yasihirisa esabbiibbu kyaabwe alala neende emituli haandi yaakwiisa emisaala kyoosi.

³⁴ Haandi yalagira esike cheecha, mu buungi muno butabaliha;

³⁵ chaalya ebimera byoosi ebyali hu loba; chalya ebirime byoosi.

³⁶ Haandi yeeta abaana basyaani baamberi abomu madaala koosi akali mu Misiri.

³⁷ Mani niyeemirira Abaisiraeli yaabatusa erwaanyi; Abaisiraeli abo bakiinga efeesa neende esaabbu, haandi boosi bali abalamu kaanga nibali neende amaani.

³⁸ Mani Abamisiri nibabatya mani basangaala nibabona Abaisiraeli nibawaao.

³⁹ Nasaae bulaanu n'abwiiha esireesi bu baandu bae haandi n'ababodoohania obulafu musiro.

⁴⁰ Basaba ebyohulya, mani n'aleeta esiindu; yababeresa ebyohulya bitula Muukulu bibeekusa.

⁴¹ Yeekulao olwaanda, mani amaachi maangi nikasooha nikatulamo, nikahulukusa nikabita mu siparara koti omwaalo.

⁴² Haandi yeechulisa esisuubise syae syoolerefu si yasuubisa Abburahamu omuhalaabani wae.

⁴³ Mani yeemirira abadoole bae yaabatusa erwaanyi, mani nibachaaka ohweemba nibakalaakasa neende esangaalo.

⁴⁴ Nasaae yabakaba amaloba akali ak'abaandu baandi yaleha Abaisiraeli baabukula emikuunda ch'abaandu abo,

⁴⁵ hu baandu bae abo banyale ohuliinda amalako kae haandi neende ohwooseresa ebilagiro byae. Fumie Omwaami!