Esabbuli 104 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Muhufumia Omuloongi

¹ Ewe omwooyo kwaange, fumia Omwaami! Ewe Omwaami Nasaae waange, oli omuhunuufu muno! Wefwaalire oluyaali neende obuhunuufu.

² Webwiiha obulafu koti esyefwaalo, wabaamba ekulu koti eyeema.

³ Woombaha enyuumba yao hu maachi kali aakulu. Wahola ebireesi ohuba ebigaari byao. Wiiruhira hu mbaya ch'omuyaka.

⁴ Wahola omuyaka ohuba bawamwaanda bao, omuliro neende enjeserye ohuba abahalaabani bao.

⁵ Niiwe owata esyaalo hu musiingi kwasyo, sihaye ohudeengaanisibwa daawe.

⁶ Wasibwiihaho enyaanja koti esyefwaalo, amaachi mani nikaamira engulu.

⁷ Nae niwakahabuhira keecha kahulukusa; kahulukusa nikawulira ekono lyao nilyaaduluhana.

⁸ Amaachi kahulukusira hu ngulu mani nikeehirira mu mahooho, mani nikoola abuundu yi wakatekehera.

⁹ Niiwe owakateerao enjaho chi katanyala ohuduuma, mani kahaye ohumira esyaalo haandi.

¹⁰ Niiwe owahola esulo ohusooha mu mahooho; mani emyaalo nikihulukusire akatikaati w'ebigulu.

¹¹ Ebisolo byomu siino byoosi bing'waamo amaachi; esuhiri ndeende chikwiisira omwo obuluwo bwaacho.

¹² Amayoni kabburuha koombaha aambi nacho ebiyu byako; keembera mu masaga k'emisaala.

¹³ Ohutula mu bwiihalo bwao bw'aakulu, ochuhiirisa engulu; esyaalo syeechulamo ebyaamo byao.

¹⁴ Niiwe okera obunyaasi bwaamera eng'oombe chaaya, neende ebimera bi baandu balima, hu banyale ohunyoola ebyohulya ohutula mu loba,

¹⁵ neende efiini ohusangaasa emyooyo ky'abaandu, amafuta k'emiseituuni ohung'iya obweeni bwaabwe, neende ebyohulya ohubakobosamo amaani.

¹⁶ Emisaala ky'Omwaami kinyoola amaachi maangi muno, emituumba kya Lebbanooni chi yataaka.

¹⁷ Omwo nimwo mu mayoni koombaha ebiyu byako; namuniingye hoombahamo obumenyo bwaho.

¹⁸ Emboongo chimenya mu ngulu ndeeyi; nae ebiduuyu byamenya mu makina.

¹⁹ Wahola omwoosi kukabule obwiire; elyuuba limanyire ebiha by'ohukwiiramo.

²⁰ Otaao esiirima, mani syaaba esiro, ebisolo byomu siino byeecha byaasobohayo.

²¹ Edalang'i njere chachaaka ohuwoola nichidaha ohulya, nichikoonya ebyohulya ohutula eyiri Nasaae.

²² Nae elyuuba nilitula sa liti, chikaluhayo mani cheyalisa mu buko bwaacho.

²³ Nae abaandu batula bachaaka ohuhola emirimo chaabwe mani badidiihana ohwoola lu bwiira.

²⁴ Ewe Omwaami, ohola ebiindu biingi muno! Byosi-byoosi wabihola neende amakesi maangi; esyaalo syeechulamo ebiloonge byao.

²⁵ Bonaho sa enyaanja, hoongo haandi maambali muno, eyirimo ebiloonge biingi muno ebitabaliha, ebiindu bilamu ebidiidi neende ebihoongo.

²⁶ Emeeri chiiruhira hu nyaanja ohwo, neende ebisyuuhira-banaabi bi waloonga ohubayiramo,

²⁷ Ebiindu bino byoosi bitingaala ewe, obiberese ebyohulya byabyo mu biha bihoyera.

²⁸ N'obiberesa, bibuusa byaalya; n'okalamia amahono kao, bilya ebiindu bilai byeekuta.

²⁹ Nae niwiinamia obweeni bwao watiingaala ebuleka, byeyendeherera; n'omalao omuuya kwaabyo, bifwa mani byaakobola mu lufu lu byatulamo.

³⁰ Nae n'obiberesa omuuya kwao, nibiba ebilamu; mani waata hu syaalo obulamu buyaaha.

³¹ Leha oluyaali lw'Omwaami lubeeo endaalo choosi, leha Omwaami asangaalire ebiindu bi yaloonga.

³² Omwaami n'atingaala hu syaalo, nisiteengereha; nae n'adiira hu ngulu, nichiniooha omwoosi!

³³ Nisisiiri omulamu, njia ohweemberaanga Omwaami; mu bulamu bwaange bwoosi, njia ohweemba efuma ya Nasaae waange.

³⁴ Leha ohwekerakira hwaange humusangaase, olwohuba njia ohusangaalira mu Omwaami.

³⁵ Leha abahola-mbi basihiriswe ohutula hu syaalo, haandi ababi bahaye ohubaao! Ewe omwooyo kwaange, fumia Omwaami! Fumia Omwaami!