Esabbuli 102 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'omuraaga oli mu bidinyu

¹ Ewe Omwaami, wulira esaala yaange, leha ohulira hwaange hwoole y'oli!

² Otatingaala olwaande luundi ningwiire mu budinyu. Mbulire nihulaanga, mani wuungobolemo bwaangu!

³ Obulamu bwaange buhamyuuhao koti omwoosi; haandi amakuumba kaange kamamula koti omuliro.

⁴ Omwooyo kwaange kubeterwe koti obunyaasi, mani kuhoohere; mbula amaani k'ohulya.

⁵ Miinduha lukali muno; mbweeremo esilai syoosi, ndoong'iisye amakuumba koong'ene.

⁶ Ndi koti eyoni teende mu siparara, koti ehirihiihi liri mu kuunda.

⁷ Haba singonaangaho endoolo daawe; ndi koti eyoni lyakwa engendeehi eliri hu sirama sy'enyuumba.

⁸ Abasuku baange baanyekaanga buli ludaalo; abo abaandyaabuhira beehoonyera eliita lyaange nibachuba.

⁹ Ndemuuka ekohe koti ebyohulya byaange, haandi amasika kadoonya mu by'ohung'wa byaange;

¹⁰ olwohuba okusinye kwao neende etima lyao; wandoola mani waasukuna eyale muno.

¹¹ Obulamu bwaange buweerera koti ebiiniha by'engoloobe; hoohere koti obunyaasi.

¹² Nae ewe Omwaami, niiwe omutuki w'endaalo choosi; eliita lyao liyiindira endaalo choosi pe.

¹³ Waheechie mani okwiire Siyooni esisa; mbao esiha syoolere esy'ohuleheramo; mubwadyeeri, sino nisyo esiha.

¹⁴ Abahalaabani bao baheera Siyooni muno, engisa yibadiira ohubona koti lu sisihiirirwe.

¹⁵ Ebyaalo biindi byoosi bichia ohutya eliita ly'Omwaami; abatuki boosi abohu syaalo bahatye oluyaali lwae.

¹⁶ Olwohuba Omwaami yahoombahe Siyooni buyaaha, yaheekese oluyaali lwae.

¹⁷ Omwaami achia ohuwulira esaala yaabo abali mu budahano, haba siyahalekeerese ohusaba hwaabwe.

¹⁸ Leha sino syandiikirwe ab'olwiibulo lwahabeeo, abaandu basisiiri ohwiibulwa banyale ohufumia Omwaami.

¹⁹ Omwaami yatingaala aasi n'ali aakulu mu bwiihalo bwae bwoolerefu, yatingaalira aasi hu syaalo naali muukulu.

²⁰ Yawulira ohubiinduha hw'ababoye, mani n'aboolola abo abali baheengerwa omusaango k'ohufwa,

²¹ hu baandu banyale ohulaanga eliita ly'Omwaami mu Siyooni, haandi bamufumie mu Yerusalemu,

²² abaandu bebuuse alala, neende obwaami, bwebuuse alala ohwiinamira Omwaami.

²³ Omwaami amaliremo amaani nisisiiri omuraaga; yeembikitaanie obulamu bwaange.

²⁴ “Ewe Nasaae waange, otaandusao nisisiiri ohukofula, ewe oliwo haandi oyiindira endaalo choosi!”

²⁵ Waloonga esyaalo hale-na-haandi muno, haandi niiwe weeng'ene owahola ekulu.

²⁶ Ebyo bichia ohukotao, nae ewe oyiindira endaalo choosi. Ebyo byoosi bichia ohukofula koti engubo. Ewe ochia ohubisukuna koti engubo ngofu, mani bikoteo.

²⁷ Nae ewe haba s'okaluuhanaho daawe, haandi obulamu bwao haba sibwahaakame daawe.

²⁸ Abaana b'abahalaabani bao bahabeeo bulai, ewe n'obaliinda. Abeechuhulu baabwe bahabecheengeo mu moni wao.