Esabbuli 101 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esisuubise sy'omutuki

¹ Njia ohweemba hu bweesikwa neende hu bwadyeeri, hweembere ewe Omwaami.

² Njia ohuloondakana ebiima bilai. Mani waheechie liina yi ndi? Njia ohubechaanga neende omwooyo mulai mu nyuumba yaange.

³ Haba siinjia ohweesudyaho esiindu syoosi esitahoyera. Ese sindahana neende ebiholwa by'abaandu beetusa eyiri Nasaae. Haba siinjia ohubeyaambaniaho.

⁴ Abadoondobanu njia ohubebwabaanga, haandi haba siinjia ohuholera alala neende abahola-mbi.

⁵ Njia ohweetusaho oyo obachira owaasye, omoonya owaasye; haba siinjia ohwesimiirisa oyo oli ohweniinia yeesi neende owehuduumbasa.

⁶ Njia ohusiimaanga abo abeesika Nasaae. Abo abaloondakana neende ebiima bilai nibo abachia ohuuhalaabanira.

⁷ Abulao omuundu mubacha yeesi yi njia ohufukiirira ohumenya mu nyuumba yaange; abulao omwebachirisi yeesi ochia ohuba alala naange.

⁸ Buli buhya, njia ohusihirisaanga abahola-mbi bali mu syaalo syeefwe. Njia ohumalirayo elalira abahola-mbi boosi batule mu siko sy'Omwaami.