Engaado 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mwaana waange, diiraanga emboosi chaange haandi otebiriraanga ohuliinda ebilagiro bi huberesa.

² Niwooseresa ebilagiro byaange, ao ochia ohuyiindira, liindaanga ebiindu bi hulagira, koti lu wahaliinda emoni yao.

³ Byeboyeenge hu muhono kwao, haandi obyandiikeenge mu mwooyo kwao mukati bweene.

⁴ Boolera makesi oti, “Niiwe mboocho yaange,” haandi laangaanga ohumanya oti omwiicha wao mweene.

⁵ Bichia ohuhuliinda bihuwonie omuhasi mucheke, haandi bihuwonie omuhasi ohusendaseenda neende emboosi chinyunyuula.

Omuhasi mucheke

⁶ Olwoola, ndalingaalira mu dirisa, edirisa lyohu nyuumba yaange.

⁷ Ndabona mu basaacha babula obumanyirifu, ndabona mu baraaga, mulala obulamo amakesi.

⁸ Yali nang'alalaanga hu ngira n'abita hu koona aambi neende enyuumba yae, n'adiirire engira yichia ena nyuumba w'omuhasi wuundi.

⁹ Byali ebiha by'engoloobe, esiirima nisimalire ohudiira.

¹⁰ Mani bone, omuhasi yabukaanana nae, niyefwaalire koti malaya, naali neende omwooyo mweetekefu.

¹¹ Yalomalomaanga n'ahuumula haandi n'abula esoni, buli ludaalo n'akeendaanga, ataali ohwiihala mu ngo wae.

¹² Ebiha biindi yeyemeeresaanga hu ngira, haandi ebiindi niyeyemeeresa mu siito, haandi yeyalisaanga hu buli koona n'aliindiriire.

¹³ Mani omuhasi oyo n'adiira omuraaga n'amukwa mu sirifu, n'amutingaala tiiri mu moni, n'amuboolera ati,

¹⁴ “Nyaanireyo olwaleero ebiyaanwa by'ohusaasania, haandi malire ohwooseresa obweyamo bwaange;

¹⁵ bulaanu sakira njichire ohuhubukaanira. Ohuteemaho ohuhukoonya, mani ndahunyoola.

¹⁶ Malire ohwaala obuliri bwaange neende amasuuka, k'eraangi ndai akatula Misiri.

¹⁷ Mu buliri bwaange, ndeeremo eby'esing'aari, neende miira, aloe, neende sinamooni.

¹⁸ Hola bwaangu, leha hukonane esiro syoosi ohwoola echuli; leha abeene hwesangaasire mu budya.

¹⁹ Olwohuba wamwaange haba saali engo; achiire hu lukeendo lw'eyale, ali eyale.

²⁰ Achiire neende eseende enyiingi muno; achia ohumalayo ejuma chibiri, amale akobole.”

²¹ Omuhasi oyo n'amuserera neende emboosi chae ndai mani n'afukiirira; mani omuraaga oyo n'afukiirira hulw'emboosi chinyunyuula echo omuhasi oyo.

²² Mani amaangu ako, ni omuraaga oyo amuloondaho, koti endaawu yicha ohusiinjwa, oba koti esolo yichia ohudiiswa mu muteego

²³ ohwoola lu hasaale hahayifumite yaafwa. Omuraaga oyo yali koti eyoni lyaanguya ohukwa mu luhaanda; yali nataamanyire ati ali ohufwa, ati obulamu bwae buli ohuwaao.

²⁴ Mani bulaanu, eng'we baana baange, wulire bi mboola, haandi tekeerese emboosi chi nomanoma.

²⁵ Mutafukiiriraanga amakesi k'omuhasi koti oyo kayira emyooyo kyeeng'we, mutaloondakanaanga neende engeri chae;

²⁶ olwohuba yasihirisa abasaacha baangi muno; eee, bayafumita baafwa haba simunyala mwababala mwabamala.

²⁷ Ohuchia mu nyuumba yae niyo engira yiihirira emakoombe, niyo eyibasudya aambi neende ohufwa.