Engaado 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohulabula hudiira hu bucheke

¹ Mwaana waange, tekaanga ohutwi owulira amakesi kaange, tekaanga ohutwi, mani wehaliirisa ohumanya hwaange;

² ao mani ochia ohumanya engeri yohweeyiriramo bulai, haandi emboosi chao chekeeseenge chiti olimo amakesi.

³ Olwohuba omunwa kw'omucheke kudoonya obuuhi, haandi emboosi chi alomaloma nyirifu ohuhiraho amafuta k'omuseituuni;

⁴ nae muhumaliiriha, ahuleha mubuchuuni buhahaata koti oyo ohoombere hu mululuusa, haandi obuchuuni nibubitiriire.

⁵ Ahwiihirisa aasi mu hufwa; haandi engira yi ahutaaho yihuyira emakoombe.

⁶ Haba sadoong'a hu ngira y'obulamu; yayitulaho hale nataamanyire.

⁷ Bulaanu eng'we baana baange, wulireenge bi mboola, haandi mutalehanaanga neende bi mboolere.

⁸ Weyaabeenge omuhasi mucheke, haandi otasudaangaho aambi neende enyuumba yae;

⁹ ataali ao abaandu baandi bachia ohuyira oluyaali lwao mani abaandu baalaba bachia ohuhwiita n'osisiiri omuyere.

¹⁰ Eee, bawalukeenda bachia ohuyira myaandu kyao, mani ebiindu bi wahalaabanira bicha ohuba eby'omuundu wuundi.

¹¹ Mani olifwa niweyendehereere, nong'ayire nodoong'ere amakuumba koong'ene.

¹² Luunyuma oliboola oti, “Lwasiina ndahaya ohukerakirwa, mani ndaalekeeresa ohwoolobisibwa!

¹³ Haba sindawuliraanga abeekesa baange oba ndatekeeresaanga abakeraki baange.

¹⁴ Mani ndaba aambi ohwenyoola ni ndiirirwe esoni mu lwichuule lw'abaandu.”

¹⁵ Omuhasi wao ali koti esulo y'amaachi malai, amaachi kahulukusa ak'omwaalo kwao kweene.

¹⁶ Lwasiina osalaania obumwo bwao eno neende era, omuhula kwao nikuhulukusira hu ngira?

¹⁷ Amaachi komu sebere yao kabeenge akao weeng'ene, nae ataali akao neende abateende.

¹⁸ Leha esebere yao yibe ey'ehabi, haandi osangaaleenge neende omuhasi yi wadeehya n'oli omuraaga,

¹⁹ omulai haandi ow'oluyaali koti emboongo. Leha ahusaangaseenge endaalo ch'obulamu bwao choosi, buli ludaalo osaangalireenge mu budya bwae.

²⁰ Mwaana waange, lwasiina osaangaliraanga omuhasi mucheke mani waakwa mu sirifu sya malaaya?

²¹ Olwohuba Omwaami abona buli siindu sy'ohola, yehaliirisa buli ngira yodiira.

²² Ebyonoono by'omuundu nibyo omuteego kwae, mani yayambisa mu luhaanda lw'ebibi byae.

²³ Afwa olwohuba nandawulira niye, haandi olwohuba obusiru bwae buungi, bwahamuyire mu ng'ani.