Engaado 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohukerakira abaraaga

¹ Mwaana waange, oteebirira bi hweekesa, nae leha omwooyo kwao kudiire ebilagiro byaange;

² olwohuba wahanyoole ohuyiindira hw'endaalo nyiingi neende emyaaka miingi mani wahanyoole obulamu bw'omuleembe.

³ Otalehanaanga neende obwadyeeri neende obweesikwa; biboyeenge muukosi mwao, byandikeenge hu mwooyo kwao.

⁴ Ao mani ochia ohusiimwaangwa haandi odahweengwe mu moni wa Nasaae neende mu w'abaandu.

⁵ Weesikeenge Omwaami neende omwooyo kwao kwoosi, haandi otesikaanga ohumanya hwao hwoong'ene.

⁶ Mu buli siindu sy'ohola, yichulisaanga Omwaami, mani achia ohweekesaanga engira ndai.

⁷ Oteekesiyasaanga omweene; tichaanga Omwaami, mani ohayeenge ohwonoona.

⁸ Esyo sinabecheenge amalesi kawonia ebikoonjo byao haandi esyahayenjeese obuchuuni bw'amakuumba kao.

⁹ Yisaanga oluyaali mu Omwaami n'omuyaanira hu biindu byao haandi omubechaanga ebiindu bilai bi otaangira ohukesa byoosi;

¹⁰ ao mani ebyaaki byao bichia ohwiichulaanga ekesa, haandi ebinyuhiro byao bichia ohwiichulamo efiini ndai.

¹¹ Mwaana waange, Omwaami byahukerakira, haba otabirekeresaanga haandi otasinyihaanga n'ahwolobya.

¹² Olwohuba Omwaami akolola abo b'adaha, koti omwiibusi lu akolola omwaana yi yehoyeramo.

¹³ W'ehabi oyo oli neende makesi, haandi w'ehabi oyo onyoola ohumanya,

¹⁴ olwohuba omukabo ku onyoolamo kuhira omukabo kw'efeesa haandi omusaara kwaako kuhira esaabbu.

¹⁵ Amakesi k'engaanga ohuhira amakina k'engaanga, haandi sibulao esiindu si wekoomba esinyala ohukeranisibwa hu Makesi.

¹⁶ Makesi akera n'oyiindira haandi kahuberesa obuyiinda neende oluyaali.

¹⁷ Makesi ahuberesa obulamu bw'ohusangaaliraangamo, haandi emihoosi kyako kyoosi ky'omuleembe nikyo.

¹⁸ Makesi niye omusaala kwobulamu eyiri abo abamwomiiriraho; b'ehabi abo abakomiiriraho.

¹⁹ Omwaami esyaalo sino yasiloongera amakesi; haandi ekulu yalitaao neende ohumanya;

²⁰ amakesi kae niko kahulukusa emyaalo, haandi niko akakwiisa aasi olume.

²¹ Mwaana waange, wediireenge hu makesi malai neende ohwehaliirisa; otalehaanga kahweeyibaho mu moni wao,

²² mani bichia ohuba obulamu bwao haandi binyirisa muukosi mwao.

²³ Mani wahakeende bulai olukeendo lwao haandi haba siwaheegumule.

²⁴ Niwahehala aasi, haba soochia hutya; niwaheyalise aasi ohukona endoolo chahahulyoyereenge.

²⁵ Oteyendehereraanga amasira nikahukwaaho, oba ohusihirira hw'esyonoono nihuhukwaaho koti omuyaka;

²⁶ olwohuba Omwaami niye ochia ohuhuliindaanga haandi achia ohukeraanga ohaya ohukwa mu muteego.

²⁷ Otahayaanga ohuhoonya abo abadaha obuhoonyi, nooba noonyala ohuhoonya.

²⁸ Otabooleraanga owaasyo oti, “Waawo bulaanu, mani okobole hale, njia ohuhusiberesa muchuli” nooba nooli nasyo ebiha ebyo.

²⁹ Otaholaanga endekeha yohuholera owaasyo esibi owamenya aambi naawe nahweesika.

³⁰ Otasoolanaanga neende omuundu ataali esifune, ataali esibi syahuholere.

³¹ Otekoombaanga omuundu w'egiili haandi otaheengaangao ohuloondakana neende ebiholwa byae;

³² olwohuba Omwaami haba saadaha omuhola mbi, nae yeesika abaluungifu.

³³ Omwaami abwaaba enyuumba y'abahola-mbi, nae aberesa ehabi abo abamenya mu buluungifu.

³⁴ Mulekeresi eyiri abalekeeresi, nae eyiri abaloonga, abakwiira esisa.

³⁵ Abakesi bachia ohunyoola oluyaali, nae abasiru, bahemeede sa ohudiirwaangwa esoni.