Engaado 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Omuundu yi boolobya buli lu aholere esibi, mani yaasyomeraho, ludaalo luundi yahanyoole n'atamanyire, mani abuleo omuundu omuwonia.

² Abaandu baluungifu nibali mu bunyala, abaandu ba buli ludaalo basangaala; nae abahola-mbi nibatuka, abaandu bekanyiirisa.

³ Oyo odaha amakesi asangaasa laatang'ene, nae oyo aba alala neende bamalaaya, amalao emyaandu chae.

⁴ Omutuki oheenga emisaango mubwadyeeri, aleetera esyaalo syae omuleembe, nae oyo odaha akuliirirwa, asihirisa esyaalo syae.

⁵ Omuundu okinia-kinia owaasye n'amubacha aba amuteka omuteego.

⁶ Omuhola-mbi adiirirwa mu bibi byae byeene, nae omuluungifu asangaala niyeemba.

⁷ Omuundu mulai amanyire ebiindu bi bamanani bahoyerwa ohunyoola; nae omuhola-mbi haba sadeebayo.

⁸ Abaandu batachuunirwa abasyaabwe banyala ohukwiisa esiisi mu siko, nae abaandu bakesi bamalao obwaalaba.

⁹ Omuundu w'amakesi n'ayiingana neende omusiru, omusiru anyoolera haandi yaacheha, mani yaleeta esiyoka.

¹⁰ Abaandu baheera muno ohutemula haba si badaha omuundu otaliho omusaango, nae abaandu baluungifu bateemaho muno ohuwonia obulamu bwae,

¹¹ Omusiru yekesa etima lyae lyoosi, nae omuundu mukesi mudiira kaala niye haandi saanyolera bwaangu.

¹² Omutuki n'atekeeresa eby'obubacha, abachweenufu bae boosi bachia ohuba ababacha.

¹³ Omumanani neende oyo omufwiinyirira boombi bali neende esibayambaania; boombi Omwaami niye obaberesa obulafu mani baabona.

¹⁴ Omutuki n'aheenga emisaango ky'abamanani mubwadyeeri, obwaami bwae buchia ohuyiindira endaalo choosi.

¹⁵ Ohukolola neende ohwolobya byeekesa, nae omwaana olehwa sa adiisa ng'ina esoni.

¹⁶ Abahola-mbi nibaba mu bunyala, ohwonoona hwemeeda; nae abaluungifu bahabone ohusihirira hwaabwe.

¹⁷ Kolola omwaana wao, mani yahahuberese omwehoyo; haandi yahahuleetere esangaalo.

¹⁸ Esyaalo sitemererwa neende Nasaae, sibulamo esiindu silai, nae bali neende ehabi abo abaliinda amalako.

¹⁹ Omuhalaabani haba s'akololwa neende emboosi choong'ene, olwohuba, kata yahaba omuwuliri, haba saachia hutaaho esira.

²⁰ Omuundu musiru yahabaaho neende esiindu sy'omusuubiramo, ohuhira omuundu webwangula neende emboosi.

²¹ Oyo oberesa omuhalaabani wae buli siindu sy'adaha ohutula mubuyere bwae, luunyuma yahenyoole ati s'anyala ohumutuka.

²² Omuundu w'etima asiingisa obusoolo, haandi omuundu odaha ohunyoolera buli siha ahola ebibi.

²³ Omuundu weniinia yaheswe aasi, nae omuloonga mu mwooyo yahanyoole oluyaali.

²⁴ Oyo okeenda neende omwiibi, asyuula obulamu bwae bweene, kata bahamubwaaba batye, nae haba s'atuumbula obwadyeeri.

²⁵ Oyo otya sa bi baandu bamubaasira, yesukuna mu bidinyu, nae oyo owesika Omwaami, aba mu muleembe.

²⁶ Aliwo abaandu baangi muno abadaha abatuki babadahe, nae Omwaami niye okera abaandu banyoola obwadyeeri.

²⁷ Omuundu mubi asyuula omuundu muluungifu, nae ow'esaambo ndai asyuula omuundu mubi.