Engaado 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Abahola-mbi beeruha naabulao omuundu oboongaho, nae abaluungifu bagumu koti edalang'i.

² Esyaalo nisihayuha, siba neende abatuki baangi; nae nisinyoola omutuki w'amakesi haandi mumanyirifu nisilyooya mani syaaba neende omuleembe.

³ Ow'obunyala ofwiinyirira abamanani, ali koti efula yo muyaka eyisihirisa ebyohulya.

⁴ Abo abateesa oluyaali mu malako bafumia abahola-mbi; nae abo abadiira amalako abalwaania.

⁵ Abaandu babi haba sibamanyire obwadyeeri, nae abo abeesa oluyali mu Omwaami bamumanyiire elalira.

⁶ Silai ohuba omumanani nooli omweesikwa ohuhira ohuba omuyiinda nae oli omudondobanu mu bulamu bwao.

⁷ Omwaana odiira amalako mukesi niye, nae omwiicha w'omuundu wokuliira adiisa laatang'ene esoni.

⁸ Oyo onyoola engaanga naseera abaasye, obuyiinda bwae abubuusira oyo okwiira abamanani esisa.

⁹ Oyo otawulira amalako, kata ohwekongooya hwae Nasaae ahwebwaaba.

¹⁰ Oyo obachirisa omuundu muluungifu yaakera yahola esyonoono omweene yahakwe mu buko buyayaba; nae abaandu bataaliho omusaango, bahanyoole ebiindu bilai.

¹¹ Omuyiinda abaasa buli siha ati mukesi niye, nae omumanani mumanyirifu amufuumbula.

¹² Omuundu muluungifu n'anyoola obunyala, esangaalo liingi libaao; nae nibahusa omuhola-mbi, buli muundu niyeekisa.

¹³ Oyo okisa ebibi bi yahola haba saacha huba bulai, nae oyo obituumbula mani yabisyuula achia ohukwiirwa esisa.

¹⁴ Oyo owiisa oluyaali mu Omwaami buli siha, w'ehabi niye, nae ojeemera Omwaami, yahanyoole amasira.

¹⁵ Omutuki mubi otuka abamanani, ali koti edalang'i yiwuluhuma oba koti enani lyedeeya ohukwa hu siindu.

¹⁶ Omutuki otadeeba hu baandu aba omwalaaba; nae oyo otadaha obulyaanga, achia otuka emyaaka miingi.

¹⁷ Omuundu n'ahola omusaango kw'ohwiita owaasye, lehe bamweyaabe ohwoola lu yahafwe; haandi leha abuleo omuundu omuhoonya.

¹⁸ Oyo ohola ebiindu by'obweesikwa yahawone, nae oyo ohola eby'obudoondobanu yahamalweo bwaangu.

¹⁹ Oyo olima eloba lyae yahabe neende ebyohulya biingi muno, nae oyo omala ebiha byae alala neende abakata, yahabecheenge omumanani.

²⁰ Omuundu mweesikwa alinyoola ehabi nyiingi, nae oyo ong'ang'abanira obuyiinda, haba siyahahaye ohusaandisibwa.

²¹ Ohweekesa oti wehubbira-hubbira sibi nisyo; nae abaheengi b'emisaango baandi bahola esibi hu banyoole asowa ndiidi.

²² Omuundu mwiimani, ayuyuhanira emyaandu, mani yahaya ohumanya ati obudahano bwahamwooleho.

²³ Oyo okolola owaasye naaholere esibi bahamusiime luunyuma ohuhira oyo omukinia-kinia.

²⁴ Oyo owiiba ebiindu bya laatang'ene oba ebya ng'ina mani yaboola ati, “Yibulao omusaango,” ali silala neende omuundu osihirisa.

²⁵ Oyo olaluhanira ebiindu aleeta obusoolo, nae oyo owesika Omwaami achia ohunyoola ehabi.

²⁶ Oyo owesika ebiindu bi abaasa, musiru niye; nae oyo oloondakana neende bibamwekeese by'amakesi achia ohuwona.

²⁷ Oyo okabiraho abamanani, haba siyahahaywe esiindu sy'adaha, nae oyo owekisa nabweene abamanani, abaandu baangi bahamubwaabe.

²⁸ Abaandu babi nibaba mu bunyala, abaandu babeekisa, nae nibatula hu bwaami, nae abaluungifu bemeeda haandi.