Engaado 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Engaado cha Solomooni chiindi

¹ Chino chosi ngaado cha Solomooni, chi baandiiki ba Hesekia omutuki wa Buyudaaya baanula baandiika haandi buyaaha.

² Hwiisa oluyaali mu Nasaae hulw'ebiindu bi akisa, nae hwiisa oluyaali mu batuki hulw'ebiindu bi batotola.

³ Koti ekulu lyeniinia aakulu, haandi esyaalo syoloberera aasi, nilwo lu bibaaso by'omutuki bidinyu ohumanya.

⁴ N'osaamba efeesa mani watusamo obuchaafu bwoosi, ao omwiitaanyi anyala ohwiyiitaniamo esiindu syoosi ysaadaha.

⁵ Malao abakeraki babi mu moni w'omutuki, mani ochia ohubona koti obwaami bwae bucha ohubaamo obuluungifu.

⁶ Oteniiniaanga mu moni w'omutuki oba wetechaanga mu bweyaango bw'abahunuufu;

⁷ olwohuba silai bahuboolera bati, “Yiicha aakulu eno,” ohuhira ohuhwiisa aasi mu moni w'omuhunuufu. Ebiindu bi oba n'obweene

⁸ haba siwanguyaanga ohubileeta mu siina; olwohuba siina syeene syoonahole mu luunyuma lweene, owaasyo wuundi naatusa obuloli bwadyeeri obuhudiisa esoni?

⁹ Nisiruwo esifune akatikaati wao neende owaasyo, musimalirise mweembi, haandi otabulaanga esyaama sy'owaasyo;

¹⁰ ataali ao oyo ohuwulira achia ohuhudiisa esoni, mani wahadoong'e nodiirirwe esoni.

¹¹ Emboosi ndai yilomwalomwa mu biha bilai yiri koti ebyaamo byeengere ebiri koti esaabbu yi bateere hu saani y'efeesa.

¹² Omuundu w'amakesi byaakerakira omuundu yetekeehe ohutekeeresa, ali neende obuhoonyi ohuhira engila y'esaabbu oba esikomo sy'esaabbu syoosi.

¹³ Wamwaanda mweesikwa, akobosamo amaani, koti lu maachi manyifu kakwiisa obuluwo abakang'wa mu biha by'ekesa.

¹⁴ Omuundu asuubisa esiyaanwa syaatanyala huberesa, ali koti ebireesi neende omuyaka bitakwiisa efula.

¹⁵ Ohwesimiirisa hunyala ohusenda-senda omutuki, haandi olulimi lulai lunyiingira ow'obunyala.

¹⁶ Noonyoola obuuhi bw'enjuhi, lichaangaho bw'onyala bwoong'ene, ataali ao onyala wabitirisa ohwiikuta mani waasala.

¹⁷ Otakeniyaanga owaasyo amahabi maangi, ahaye ohuhujoong'a mani yahusyuula.

¹⁸ Omuundu wayirisa owaasye bihaya mubi muno koti endawusi y'ohulwaana, oba olugaanga, oba olusaale lwooki.

¹⁹ Ohweesika omuundu otaali omweesikwa mu biha by'obudinyu siri koti eliino lilwaalire oba ohukulu hubatuuhe.

²⁰ Oyo owembera omuundu oli mu bidinyu ali koti omuundu wefwaalula engubo mu biha by'emboo, haandi koti ohubaha omuunyu mu sikoonjo.

²¹ Enjala niyiluma omusuku wao, mubecheenge esyohulya, haandi obuluwo nibumuluma, mubecheenge esyohung'wa.

²² Olwohuba n'ohola otyo, ochia ohumuyaambya esoni, haandi Omwaami achia ohuhuberesa omukabo.

²³ Ohumoonya huleeta obwaalaba; koti lu muyaka kutula emukulu kuleeta efula.

²⁴ Silai ohumenya mu soonda hu sirama sy'enyuumba ohuhira ohumenya mu nyuumba mambali neende omuhasi mulekeresi.

²⁵ Koti lu maachi manyifu kali eyiri omuundu olumwa obuluwo, nilwo lu siri ohuwulira emboosi ndai ohutula mu syaalo sy'eyale.

²⁶ Omuundu muluungifu owewaayo eyiri omuundu mubi ali koti esulo yamadosi oba omwaalo kudubuuhire.

²⁷ Haba sisilai ohulya obuuhi buungi, nasilala haba sisilai omuundu ohukoonya ohwiswamo oluyaali.

²⁸ Omuundu okoterwe ohweetuka omweene ali koti esiko siseterwe mani syalikulwa ebida byaasyo.