Engaado 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olukaado lwohusaasaba

¹ Niwiihala aasi ohulya neende omuundu muhunuufu, wehaliiriseenge bulai ebiindu bi bateere mu moni wao.

² Weetukeenge bulai nooba nooli ow'okuliira.

³ Otang'ang'abaniraanga ebinulu bi bakabuule, olwohuba anyala ohuba naadaha ohuhuteema sa amanye koti lu oli.

Olukaado lwa chitaanu-na-chibiri

⁴ Muhudidiihana ohunyoola emyaandu, bechaanga omukesi ohaye ohunyaanira buhaya.

⁵ Emyaandu kyao kinyala ohukotao bwaangu muno n'obona sa; olwohuba emyaandu kyao kinyala ohuhubburuhaho, koti lu eeswi yibburuha niyichia aakulu.

Olukaado lwa chitaanu-na-chidatu

⁶ Otalichaanga ebyohulya by'omuundu mwiimani; haandi otekombaanga ebinulu bi akabula.

⁷ Olwohuba koti lw'abaasa mu mwooyo kwae; ahuboolera humukulu ati, “Lya haandi ng'wa!” nae mu mwooyo haba saali alala naawe.

⁸ Ochia ohusala bi oliire obimalemo, mani emboosi ndai ch'olomaloome chichia ohunyasiha buhaya.

Olukaado lwa chitaanu-na-chine

⁹ Otateemangaho ohulomaloma neende omusiru, olwohuba achia ohulekeeresa eby'amakesi by'olomaloma.

Olukaado lw'ehumi

¹⁰ Otasihulaanga amakoonge mahale oba weengirira eloba lya bamulehwa.

¹¹ Olwohuba Omwaami abalwaanira w'amaani niye; mani achia ohuyaala naawe omusaango.

Olukaado lw'ehumi-na-lulala

¹² Techaanga omwooyo kwao hu biindu bi bahukerakira haandi otekeerese emboosi chi bahweekesa.

Olukaado lw'ehumi-na-chibiri

¹³ Otalehaanga ohukolola omwaana wao; ohumuhuyaho neende olusaala, haba sihuchia humwiita.

¹⁴ Mani nomuhuyaho neende olusaala, esyo nisyo esichia ohuwonia obulamu bwae ahaye ohufwa.

Olukaado lw'ehumi-na-chidatu

¹⁵ Mwaana waange, noobaamo amakesi, syesi njia ohusangaala.

¹⁶ Njia ohusangaalaanga muno, n'onalomalomeenge eby'amakesi.

Olukaado lw'ehumi-na-chine

¹⁷ Lehaanga ohwekoomba abahola-mbi, nae wemeede ohwiisaanga oluyaali mu Omwaami buli siha.

¹⁸ Mubwadyeeri bweene omukabo kuluwo, haandi esuubi lyao haba siricha hufwa buhaya.

Olukaado lw'ehumi-na-chitaanu

¹⁹ Mwaana waange, tekeeresa obe ow'amakesi, haandi okolole ebibaaso by'obulamu bwao.

²⁰ Otabechaanga alala neende abo abekotyombera amalwa, oba abo abalaluhanira ohulya enyama.

²¹ Olwohuba abameesi neende abomutoolyo bahehole abamanani, haandi omulimo kwao nikuli ohulya neende ohung'wa byoong'ene, oli aambi ohuchaaka ohwefwaalaanga ebicheere.

Olukaado lw'ehumi-na-chisaasaba

²² Wuliraanga laatao owahwibula, haandi otalekeeresaanga maakoo kata yahaba naali omukofu.

²³ Kula obwadyeeri, nae haba otabukusa daawe; kula amakesi, ohukerakirwa, neende ohumanya.

²⁴ Laatang'ene muundu muluungifu yahasangaale muno; oyo owiibula omwaana mukesi achia ohumweehoyerangamo.

²⁵ Lehe laatao neende maakoo basangaale, leha maakoo owahwiibula yehoye.

Olukaado lw'ehumi-na-chitaanu-na-chibiri

²⁶ Mwaana waange, ta omwooyo hu biindu bi huboolera, haandi wehaliirise esaambo chaange.

²⁷ Olwohuba omuhasi ohola obwamalaaya liina lyooloberera nilyo; omuhasi mucheke mwaalo mudiiyu nikwo.

²⁸ Bahuliindirira koti omunyaka haandi baleetera abasaacha baangi ohuleha obweesikwa.

Olukaado lw'ehumi-na-chitaanu-na-chidatu

²⁹ Wiina oli neende amasira? Wiina owelalihiire? Wiina oli neende obusoolo? Wiina owekanyiirisa? Wiina oli ohunyayaliha ataali esifune? Wiina owahanya emoni?

³⁰ Nibo abo abomiirira hu malwa, abo abateema ohusaasa amalwa ka buli ngeri.

³¹ Otafukiirira ohuteemwa neende efiini yahaanye bulai, niying'en'aang'ena mu gilaasi, eyihirira bulai mu mumiro.

³² Luunyuma niyiluma koti endemo, mani yaboocha koti efubi.

³³ Mani ochia ohubona ebiindu bitaamanyihaane, haandi ochia ohulomaloma ebiindu bidoondobanu.

³⁴ Ochia ohuba koti omuundu okalaame akatikaati w'enyaanja, koti omuundu okonere aakulu w'etaanga.

³⁵ Ochia ohuboola oti, “Bahoye babe nibaahuyire, nae haba sibanyaalire; bahuyire nae haba simbulireho esiindu. Ndaasimuhe liina mani ngoboleo ngoonye amalwa kaandi.”